Jambyl oblysynyń ákimi Erbol Qarashókeev jer silkinisi tirkelgen Merki jáne T.Rysqulov aýdandaryndaǵy tabiǵi apat saldaryn joiý boiynsha jedel shtab otyrysyn ótkizdi, – dep habarlaidy Dalanews.kz.
Jiynda Merki jáne T.Rysqulov aýdandarynyń ákimderi jaǵdai boiynsha esep berdi. Aýdandarda zardap shekken azamattar tirkelmegen. Nysandar qalypty rejimde jumys istep tur.
Ákimdik málimetinshe, Merki jáne T.Rysqulov aýdanynda 14 áleýmettik nysan ishinara zardap shekken. Onyń ishinde 9 bilim berý, 2 densaýlyq saqtaý, 1 áleýmettik qorǵaý, 1 sport jáne 1 mádeniet nysany bar.
Qosymsha búlingen nysandardy anyqtaý, zerdeleý jumystary jalǵasyp jatyr.
Aýdan ákimderine aýyldyq eldi mekenderdegi nysandardy tolyq aralap, ahýaldy kózben kórý, turǵyndar arasynda túsindirý jumystaryn kúsheitý, qajettiligine qarai psihologiialyq kómek kórsetý tapsyryldy.
Oblys ákimi BAQ pen áleýmettik jelilerde shyndyqqa janaspaityn jalǵan aqparattar taralyp jatqanyna nazar aýdaryp, jambyldyqtardy tek resmi aqparat kózderine senýge shaqyrdy.
"Turǵyndardy alańdatqan nárse - Merki aýdanyna tehnikalar kelýi, ýaqytsha shatyrlar ornatylýy. Bul tótenshe jaǵdailardyń aldyn alýǵa baǵyttalǵan algoritmge sáikes júrgizilip jatyr. Alańdaýǵa negiz joq. Bul - tiisti mekemelerdiń kúsheitilgen rejimde jumys istep, qaýipsizdikti qamtamasyz etýge baǵyttalǵan saqtyq sharalary", - dep jazylǵan habarlamada.
Aita keteiik, 28 naýryzda túnde Jambyl oblysynyń birqatar aýdany men Taraz qalasynda jer silkinisi tirkeldi.
Jer asty dúmpýiniń joǵary qarqyny 5 ball boldy, bul Merki aýdanynda tirkeldi. T.Rysqulov aýdanynda jer silkinisiniń kúshi 4 ball, Taraz qalasy men qalǵan aýdandarda 2 ball boldy.
Jer silkinisi 15:56-da qaita sezildi.
Oblys ákiminiń tapsyrmasyna sáikes jedel shtab jumys istep jatyr.
