Qazaqstanda mindetti áleýmettik meditsinalyq saqtandyrý (MÁMS) júiesine jarna tóleý tártibine ózgerister engizilýi múmkin. Bul týraly Densaýlyq saqtaý ministri Aqmaral Álnazarova Májilis kýlýarynda jýrnalisterge túsindirip berdi, dep habarlaidy Dalanews.kz.
Ministrdiń aitýynsha, qazirgi júiede azamattar jalaqy mólsherine qaramastan, tek 850 myń teńgege deiingi tabysynan ǵana 2 paiyz jarna tóleidi. Máselen, bir adam 150 myń teńge jalaqy alsa da, 1,5 million teńge alsa da, jarna tek 850 myń teńgege deiin esepteledi.
«Bolashaqta jalaqy kólemi qansha bolsa da, 2 paiyz sol tolyq somadan ustalady degen ózgeris engizý kózdelip otyr», — dedi Aqmaral Álnazarova.
Onyń sózinshe, bul bastama tabysy joǵary azamattarǵa ǵana qatysty bolady jáne tabysy tómen turǵyndarǵa qosymsha aýyrtpalyq túsirmeidi.
Ministrdiń málimetinshe, mundai joǵary jalaqy alatyndar halyqtyń nebári 10 paiyzyna jýyq. Sondyqtan usynylyp otyrǵan ózgeris kópshilikke áser etpeidi.
«Eger bul ózgeris qabyldansa, halyqtyń 90 paiyzy úshin qazirgi júie sol qalpynda saqtalady. Tek 850 myń teńgeden joǵary jalaqy alatyndarǵa qatysty bolady», – dep naqtylady vedomstvo basshysy.
Eske salaiyq, buǵan deiin Qazaqstanda taǵy bir sanattaǵy azamattar úshin mindetti áleýmettik meditsinalyq saqtandyrý (MÁMS) qoryna jarnany ákimdikter tóleitinin jazǵan edik. Bul jańashyldyq 2026 jyldyń 1 qańtarynan bastap kúshine enýi múmkin.
Tiisti norma MÁMS týraly zań jobasyna engizilip, Májiliste birinshi oqylymda qaraldy.
Jańa jeńildik sanatyna áleýmettik turǵydan osal azamattar kirmek. Naqtyraq aitqanda, ál-aýqat deńgeii "daǵdarystyq" nemese "shuǵyl" dep baǵalanatyn otbasylar qamtylady. Bul týraly Eńbek jáne halyqty áleýmettik qorǵaý vitse-ministri Oljas Anafin málimdedi.
Onyń aitýynsha, 2023 jyldan beri elimizde "Otbasynyń tsifrlyq kartasy" júiesi jumys isteidi. Sol arqyly 20 million azamat 6,2 million otbasyǵa bólingen. Qazirgi tańda áleýmettik ál-aýqat deńgeiin anyqtaýdyń arnaiy ádistemesi bar. Bul ádisteme 8 negizgi baǵyt boiynsha 80 kórsetkishti qamtidy.
