Áleýmettik jelide Germaniia azamatynyń Qazaqstanǵa qaita kóshýi týraly aitqan videosy qyzý talqylanyp jatyr. Onda ol nege Eýropany emes, dál osy eldi tańdaǵanyn túsindirip, óz sheshiminiń sebebin kópshilikpen bólisti, dep habarlaidy Dalanews.kz.
Aitýynsha, Eýroodaq elderiniń kez kelgeninde emin-erkin ómir súrýge quqyǵy bola tura, onyń júregi Qazaqstanǵa tartqan.
"Biz Germaniia azamatymyz. Mine, meniń tólqujatym. Árine, Eýroodaqtyń kez kelgen eline kóship, qalaǵan jerde turýǵa quqymyz bar. Biraq men ne istedim? Men ne istedim, bilesiz be? Aqyry viza alý úshin barlyq anketany toltyryp shyqtym. Bul — shyn máninde naǵyz synaq! Mundai anketalardy toltyryp kórgender meni jaqsy túsinedi. Qansha paraqty búldirip tastaǵanymdy qarańyzshy..." — deidi ol.
Onyń sózinshe, munyń bári Qazaqstanǵa kóshý úshin jasalǵan qadamdar.
"Biz Qazaqstanǵa bara jatyrmyz. Óitkeni búiregimiz únemi sol jaqqa burady. Bizdiń janymyz sonda turady. Meniń janym Qazaqstanda", — deidi jeli qoldanýshysy.
Bul video kóptiń kóńilinen shyǵyp, áleýmettik jelide qyzý qoldaý tapty. Jeli qoldanýshylary keiipkerdiń sheshimine jyly pikirlerin qaldyrýda:
"Qosh keldińder! Eger jan qalaýyń bolsa, demek Otanyń osy jer", – deidi oqyrmandardyń biri.
Taǵy bir qoldanýshy: "Qazaq jeri – jer betindegi jumaq, nemister eń bir tekti halyqtyń biri", – dep yqylasyn bildirgen.
"Óte durys sheshim! Qazaqtyń jeri qashan da baýyrmal, nemis aǵaiyndardy qushaq jaia qarsy alamyz", – deidi kelesi pikir iesi.
Sondai-aq, jelidegi jurtshylyq "Tarihi Otanyńnan asqan baqyt joq", "Nemister óte mádenietti, eńbekqor halyq", "Janyńa ne jaqyn, sony tańdaǵanyń durys" dep pikirlerin jalǵastyrýda.
Aita keteiik, Qazaqstannan Germaniiaǵa qonys aýdarǵan etnikalyq nemister elge degen saǵynyshtaryn jii bildirip otyrady. Jaqynda olar áleýmettik jelide Qazaqstanǵa degen súiispenshiligin aiǵaqtaityn áserli beinejazba jariialady. Onda Germaniiadaǵy merekelik basqosý Qazaqstannyń Memlekettik ánuranyn oryndaýmen bastalǵan.
Jiyn barysynda ústel ústindegi torttyń betine Qazaqstan men Germaniianyń týlary beinelengeni kórinedi. Al basqosý sońynda eki eldiń týyn biriktirip alyp shyǵýy kópshiliktiń júregin eljiretti. Bul – týǵan jerge degen riiasyz saǵynyshtyń jarqyn kórinisi.
