Qazaqstanda zeinetaqy jinaǵyn paidalanýǵa qatysty jańa shekteý engizildi, dep habarlaidy Dalanews.kz.
4 jeltoqsannan bastap enpf-otbasy.kz platformasynda oftalmologiialyq qyzmetterdi birjolǵy zeinetaqy tólemderi (BZT) arqyly óteýge ótinim qabyldaý toqtatyldy.
Bank ókilderiniń aitýynsha, osy kúnge deiin túsken barlyq ótinish mán-jaiyna sai qaralyp, bekitilgen tártippen óńdeletin bolady.
«Ótinim qabyldaýdyń toqtatylýyna Densaýlyq saqtaý ministrligi bekitken, BZT qarajatyn emdelýge paidalaný qaǵidalaryna engizilgen ózgerister sebep boldy. 2025 jylǵy 3 jeltoqsanda shyqqan buiryqqa sáikes, endi zeinetaqy jinaǵyn stomatologiialyq qyzmetterge ǵana emes, oftalmologiiaǵa da jumsaýǵa ruqsat berilmeidi», - dep habarlady qarjy uiymy.
Otbasy banktiń dereginshe, qazir «oftalmologiia» baǵyty boiynsha 15 808 ótinim qaralýda. Olardyń jalpy somasy - 13,3 mlrd teńge.
Bank mamandary 4,6 mlrd teńgeni quraityn 5 myńnan asa ótinim boiynsha qujattardy tekserip jatyr. Al 10 677 ótinish iesinen (8,7 mlrd teńge) qosymsha qujat talap etilgen.
«Stomatologiia boiynsha ótinim qabyldaý toqtaǵannan keiin oftalmologiialyq qyzmetke suranys aitarlyqtai artty. 15 qyrkúiekke deiin ai saiyn shamamen 174 ótinish maquldansa, shekteýden keiin bul kórsetkish 1 264-ke deiin ósti - ósim 7 eseden de kóp», - deidi bank ókilderi.
Sonymen birge uiym birneshe kúmándi jaǵdai anyqtalǵanyn jetkizdi.
«Bir oftalmologiialyq klinikamen kelisimshart jasaǵan ártúrli klientterdiń ótinishteri kelip túsken. Biraq qujattarda klinika ár qalada basqa mekenjaimen kórsetilgen. Tekserý kezinde ol mekenjailarda mundai mekeme joq bolyp shyqty», - delingen habarlamada.
Bank qazaqstandyqtardyń zeinetaqy jinaǵyn áli de ómirlik mańyzy bar, qymbat em túrlerine paidalana alatynyn da atap ótti.
