Qazaqstannyń Bas respýblikalyq meshitine «Nursultan meshiti» ataýy berildi, dep habarlaidy dalanews.kz.
Qazaqstan musylmandary dini basqarmasynyń málimetinshe, budan bylai atalǵan ataý resmi túrde qoldanylady.
«Qazaqstan musylmandary dini basqarmasy Bas respýblikalyq meshitke “Nursultan meshiti” ataýy berilgenin habarlaidy. Osyǵan bailanysty bul ataý resmi qoldanysqa engiziledi», – delingen QMDB habarlamasynda.
QMDB Bas respýblikalyq meshittiń Astananyń ǵana emes, búkil Qazaqstan musylmandarynyń rýhani ortalyǵy ekenin atap ótti.
Dini basqarmanyń málimetinshe, jańa ataýmen meshit halyq birligin nyǵaitýǵa, dástúrli rýhani qundylyqtardy saqtaýǵa, igi bastamalardy qoldaýǵa, sondai-aq qoǵamdaǵy beibitshilik, kelisim jáne ózara qurmetti dáripteýge qyzmetin jalǵastyrady.
