V Dúniejúzilik kóshpendiler oiyndary aiasynda qurylǵan qazaq aýylyna kelýshiler qatary kóp. Bir apta boiy óńirlerdiń kiiz úiine kelgen qonaqtarǵa qazaqtyń ulttyq salt dástúrlerimen qatar, bai tarihy tanystyrylyp jatyr, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Túrkistan oblysynyń kiiz úilerine QR Parlament Májilisiniń depýtattary Janarbek Áshimjan, Qazybek Isa bastaǵan el aǵalary, Túrki elderiniń Jazýshylar odaǵynyń tóraǵasy Ulyqbek Esdáýlet, aqyn Maqpal Mysa syndy qalamgerler elimizdiń ziialy qaýym ókilderi, sonymen qatar sheteldik BAQ ókilderi men týrister de bas suǵyp, tarihi muramyzben tanysýda.
12 qanatty kiiz úide Túrkistan oblystyq tarihi-ólketaný mýzeii 375 dana etnografiialyq qundy jádiger qoiǵan. Olardyń qatarynda qundy jádiger Kenesary hannyń qylyshy, sonymen qatar kiiz úidiń jihazdary, áshekei buiymdar, qarý-jaraqtar, kese qaptar t. b jádigerler bar.
Túrkistan oblysynyń taǵy bir kiiz úii ulttyq salt-dástúr men ádet-ǵuryp kórinisterine arnalǵan. Munda Otyrar halyq teatry «Betashar» dástúrinen bólek, dástúrli jáne halyq ánderin shyrqaýda. Uly kompozitor Shámshi Qaldaiaqovtyń týyndylaryn kópshilik qosyla shyrqap, rizashylyqtaryn bildirip jatyr.
Kelesi kiiz úide óńirdiń ónimderi men týristik áleýeti tanystyrylyp jatyr. «Open Turkistan» týristik aqparattyq ortalyǵy «Shyǵys bazary» kórmesin kópshilik nazaryna usynýda. Onda úzdik kásipkerlerdiń taýarlary men qolónershilerdiń buiymdary qoiylǵan. Sonymen qatar oblystaǵy iri qonaqúilerdiń aqparattyq toptamalary da jarnamalanyp jatyr.
Budan bólek, túrkistandyq qolóner sheberleri óz buiymdaryn arnaiy kórme-jármeńkede kópshilik nazaryna usynyp jatyr. Elimizden bólek, sheteldik qonaqtarymyz óńir tarihymen tanysyp, qyzyǵýshylyq bildirip jatyr.
Aita keteiik, Astanadaǵy V Dúniejúzilik kóshpendiler oĭyndary 8-13 qyrkúĭek aralyǵynda ótedi. 7 qyrkúiekten bastap Etnoaýyldaǵy «Kóshpendiler álemi» óz jumysyn bastap, darhan dalanyń murasyn kópshilikke tanystyryp jatyr. Búgin Uly dala dúbiriniń jabylý saltanaty ótpek.
