Astanada Mádenıet qyzmetkerleri forýmy jalǵasyp jatyr. Búgin forýmǵa elimizdiń barlyq óńirinen kelgen mýzeı, teatr, kitaphana jáne mádenı-demalys uıymdarynyń 700-ge jýyq qyzmetkeri qatysty, – dep habarlaıdy Dalanews.kz.
Forým aıasynda ǵalymdar, tarıhshylar men arheologtar mýzeı eksponattaryn saqtaý jáne qalpyna keltirý máselelerine arnalǵan paneldik sesıaǵa qatysty. İs-sharada Qazaqstan, Ázerbaıjan jáne Reseıden kelgen sarapshylar sóz sóıledi.
Q.Qýanyshbaev atyndaǵy Qazaq ulttyq mýzykalyq-drama teatrynda teatr óneri men konserttik qyzmetke arnalǵan semınarlar ótti. İs-shara aıasynda Mádenıet nysandary tehnologıalary jáne ınjenerlik sheshimder asosıasıasynyń uıymdastyrýymen teatr jáne mádenı-kórinis alańdary mamandaryna arnalǵan biliktilikti arttyrý kýrsy uıymdastyryldy.
Oǵan álemdik deńgeıdegi jetekshi sala mamandary qatysty. Qatysýshylar kórermen áserin arttyrý, sahnany jaryqtandyrý men zamanaýı vızýal jáne jobalyq sheshimder taqyrybyn talqylady.
Sonymen qatar, kitaphana-aqparat salasyna jasandy ıntellekt tehnologıalaryn engizý, qujattardy elektrondy formatqa kóshirý jáne arhıv qorlaryn avtomattandyrý boıynsha semınarlar ótti.
Sonymen qatar búgin respýblıkalyq «Rýhanı qazyna – 2025» festıvali baıqaý komısıasynyń kezekti otyrysy ótti. Baıqaýǵa qatysýǵa 80-nen astam maman ótinim berdi. Jeńimpazdar 9 nomınasıa boıynsha anyqtalady.
