Dalanews-ke sói dep pikir bildirgen Dini ahýaldy taldaý jáne monitoring departamentiniń direktory Talǵat Jaqiianovtyń aitýynsha búginderi dindi saiasi qural retinde paidalaný úrdisi etek alǵan.
«Álemdegi kikiljińder Qazaqstanǵa da salqynyn tigizbei turmaidy. Álemdik qaýymdastyqtyń múshesi retinde bizdiń el mundai konfliktilerge bei-jai qaramaýy tiis. Alystaǵy Izrail men Palestinanyń arasyndaǵy daý bizge de sabaq bolýy qajet. Dindi saiasi qural retinde paidalaný, dindi saiasilandyrý orny tolmas ókinishke alyp keledi.
Saiasatkerler arasyndaǵy qaishylyqtyń dinge ótpeý ketpeýin nazarda ustaýǵa mindettemiz. Sebebi, mundai qaqtyǵys dini salaǵa aralassa, munyń sońy aýyr zardaptarǵa ákep soqtyrýy múmkin», – deidi sarapshy.
Jaqiianovtyń atap ótkenindei búginderi dini dialog arqyly eki tarapqa da tiimdi pátýaǵa kelý qiyndap tur. Aitalyq, AQSh pen Batys elderinde islamǵa qarsy qozǵalystardyń sany kóbeiip keledi. Al dinder arasyndaǵy alaýyzdyq saiasi janjalǵa qaraǵanda áldeqaida qaýipti.
«Qazaqstandy mysalǵa alar bolsaq, dini qaqtyǵys degen bizdiń azamattardyń tabiǵatynda joq, muny saiasilandyrý múddeleri ǵana bar. Jaman din joq, jaman ult joq, osyny túsinýge tiispiz. Qazirgi kúni provoslav áleminiń qyryqpyshaq qyrqysyp jatqanyna kýá bolyp otyrmyz. Resei men Ýkrainanyń arasyndaǵy janjal dinge de teris áser etýde. Ýkrain shirkeýi Máskeýden bólinip shyqty. Osynyń barlyǵy pravoslav qaýymdastyǵynyń sanasyna teris yqpalyn tigizip, dini dialogty daǵdarysqa tireýde», – dedi maman.
Jaqiianovtyń atap ótkenindei elimizdiń dini saiasatynda sońǵy jyldary oryn alǵan oqiǵalar nazarǵa alynýy tiis. Qazaqstannyń, Orta Aziianyń qaýipsizdigi dini saiasatqa sergek qaraýdan bastalady.
Mamannyń pikirinshe, dini baǵytta saýatty saiasat júrgizgenniń arqasynda elimizdiń Islam álemindegi bedeli artyp keledi.
“Bizdiń únimizdi, pikirimizdi, kózqarasymyzdy islam dininiń dińgegi sanalatyn kóptegen elder qoldaityn dárejege jettik.
Aitalyq, TMD keńistigindegi din máselesimen bailanysty aýqymdy jiyn, mańyzdy májilisterge musylman elderiniń basshylaryn shaqyrý úshin Qazaqstandy araǵa salady. Bylaisha aitqanda, bizdiń el órkenietter arasynda dini dialogqa dáneker bolyp otyr. Bizge osy potentsialymyzdy joǵaltpaý mańyzdy. Dinniń jasampaz potentsialyn paidalanýymyz qajet. Ultaralyq tatýlyqty sóz ótkende dini saiasatty shetke ysyrýǵa bolmaidy», – deidi sarapshy.
