EKSPO kórmesine kelýshilerdiń sany rekordqa jetti
Elordada 29 sáýir men 3 qyrkúiek aralyǵynda Ońtústik Qazaqstan oblysynyń kúnderi aiasynda halyqaralyq EKSPO-2017 mamandandyrylǵan kórmesine kelýshiler sany rekordtyq deńgeige jetkenin kórmeni uiymdastyrýshylar málimdedi. Osy kúnderi kórmeni tamashalaýǵa 398 341 adam kelgen. Orta eseppen alǵanda kúnine 56 905 adam kelgenin baiqaimyz.
Dál osy kúni EKSPO-2017 halyqaralyq mamandandyrylǵan kórmesiniń amfiteatrynda Ońtústik Qazaqstan oblysynan shyqqan estrada juldyzdarynyń «Án men kúi áldileidi Astanany» atty gala-kontserti ótken bolatyn.
«EKSPO-2017» halyqaralyq mamandandyrylǵan kórmesine arnalǵan Ońtústik Qazaqstan oblysynyń mádeniet kúnderi aiasynda ótken gala-kontsertke Qairat Nurtas, Jubanysh Jeksenuly, Altynai Jorabaeva, Nurlan Ónerbaev, Zattybek Kópbosynuly, Marjan Arapbaeva, Ibragim Eskendir, A.Jailaýbaeva syndy elimizge tanymal estrada juldyzdary óner kórsetip, jinalǵan jurttyń qulaq quryshyn qandyrǵan bolatyn.
Aita keteiik, Astanadaǵy Ońtústik Qazaqstan oblysynyń kúnderi aiasynda birqatar aýqymdy is-sharalar uiymdastyrylǵany belgili. Olardyń arasynda biznes-forým, taýar óndirýshiler men aýylsharýashylyǵy jármeńkesi de bar. Sondai-aq Ońtústik halqy Astana turǵyndaryn qaitalanbas kontserttik baǵdarlamalarymen, ulttyq at sport oiyndary jarysymen qýantty. Sonymen qatar qala turǵyndary men qonaqtaryna Qurban aitta dastarhan jaiyp, 300 keli palaý pisirip, taratty. Diqandary 40 tonna qaýyn-qarbyz ákelip, áleýmettik jaǵdaiy tómen otbasylar men balalar úiine tegin taratyp bergenin aita ketýimiz kerek.
Jalpy EKSPO-2017 kórmesi ashylǵaly beri 10 maýsymnen 3 qyrkúiekke deiin Astanaǵa kelip, kórmeni tamashalaýshylar sany 3 million 525 myń 300 adamǵa jetken.
«QmD» aqparat
