Ekonomıkalyq-áleýmettik ósim halyqtyń turaqty ómirimen tikeleı baılanysty ekenin eskersek, epıdemıologıalyq jaǵdaı kúr-delene túsken búginde jappaı vaksına saldyrý – qalypty ómirge oralýdyń birden-bir joly bolyp tur. Muny bárimiz jete túsinýimiz, indetke qarsy ortaq ımýnıtet qalyptastyrýǵa atsalysýymyz kerek.
Qazir vaksınasıalaý jumystary qarqyndy júrgizilýde. Eldik múddege saıatyn asa mańyzdy naýqannyń qalypty tirshiligimizge qaıta oralýdaǵy rólin aıqyndaý jáne kóp bolyp ekpe alǵanda qalyptasatyn áleýmettik ımýnıtet arqyly ǵana qaýipti vırýsqa túbegeıli tosqaýyl qoıýǵa bolatynan túsindirý maqsatynda qala ákimi Batyr Moldahmetov mekeme, kásiporyn ujymdarymen kezdesýler ótkizdi. Sondaı-aq, ekpe alatyn qala turǵyndaryna barynsha qolaıly jaǵdaı jasaý boıynsha naqty tapsyrmalar berdi. Búginde qalada turǵyndardyń vaksına alýyna arnalǵan 5 prosedýralyq oryn jumys istep tur. Sonymen birge, arnaıy daıyndyqtan ótken dárigerler memeke, kásiporyndarǵa baryp, egý jumystaryn júrgizýde. Ótken aptada «Kolonnada», «Tekeli-Granıt» JSHS, «Tekeli» shıpajaıy, kásiptik kolej jáne mektep, balabaqsha ujymdary ekpe saldyrdy. Qazirge deıin qalamyz boıynsha 2500 adam ekpeniń birinshi, 200 adam ekinshi dozasyn alyp úlgerdi.
Eske sala ketsek, bilikti dárigerler de, ǵalymdar da álemdik sıpat alǵan qaýipti indetti eńserýdiń joly jappaı vaksınasıalaý ekenin alǵa tartyp, adamdardy ekpe alýǵa shaqyrýda. Olardyń paıymynsha, qaýipti indet adamnan-adamǵa juǵý kezinde mýtasıaǵa ushyrap, sıpatyn ózgertedi. Qazirge deıin álemdi dúrliktirgen birneshe shtammy vırýstyń juǵymdaný kezinde paıda bolǵan jańa túrleri. Eger, indettiń betalysy baqylaýdan shyǵyp ketse, onda onyń tipti qaýipti shtammdary paıda bolýy ábden múmkin. Sondyqtan, halyqty jappaı indetke qarsy egý arqyly áleýmettik ımýnıtet qalyptastyrý óte mańyzdy. Áleýmettik ımýnıtet qalyptasqan kezde ǵana juǵymdaný deńgeıi tómendegen indet áýelgi arynan aıyrylyp, álsireı bastaıdy.
Aıtalyq, Izraıl halqynyń 80 paıyzy ekpe alǵandyqtan, eldegi epıdemıologıalyq jaǵdaı birtindep turaqtala bastaǵan. İndet órshigen kezde kúnine 100-ge deıin adam ólimi tirkelgen bolsa, qazir bul kórsetkish 10-ǵa azaıǵan.
Tekeli qalasy ákiminiń baspasóz hatshysy Uljan Uldahanqyzy
