Astanada jedel járdem feldsheri Uldana Myrzýannyń qazasyna qatysty sot otyrysy búgin jalǵasty, dep habarlaidy dalanews.kz.
Sottalýshy, MIB tóraiymy Sáýle Jubaniiazovanyń qorǵaýshysy qylmystyq isti prokýrorǵa qaitaryp, qosymsha tergeý júrgizýdi surady. Alaida sot bul ótinishti qanaǵattandyrmady.
Qorǵaýshy Dáýren Esliambekuly tergeý barysynda is úshin mańyzdy birqatar mán-jai tolyq zerttelmegenin aitty. Onyń pikirinshe, Jubaniiazovanyń kinási, onyń áreketi nemese áreketsizdigi men feldsherdiń ólimi arasyndaǵy sebep-saldarlyq bailanys, sondai-aq qaiǵyly jaǵdaidyń aldyn alý múmkindigi tolyq anyqtalmaǵan.
Qorǵaý tarapynyń aitýynsha, qurylys-tehnikalyq saraptama barysynda ǵimarattyń konstrýktsiialarynda birqatar aqaý anyqtalǵan. Atap aitqanda, kirpish qalaý jikteriniń sapasyz toltyrylýy, tik baǵyttan aýytqý, kirpish synyqtarynyń qoldanylýy jáne basqa da qurylys kemshilikteri kórsetilgen. Advokat bul máselelerdiń MIB tóraiymynyń jaýapkershiligine qanshalyqty qatysy baryn qosymsha zertteý qajet dep sanaidy.
Qorǵaýshy sonymen qatar ǵimarattaǵy qabyrǵa men qasbettegi jaryqtar 2017 jyldan beri tirkelgenine nazar aýdardy. Al Sáýle Jubaniiazova MIB tóraiymy qyzmetine tek 2025 jyldyń mamyrynda kelgen. Osyǵan bailanysty qorǵaý tarapy ǵimarattyń burynnan kele jatqan aqaýlary úshin onyń jaýapkershiligin anyqtaý qajet ekenin alǵa tartty.
Advokat isti prokýrorǵa qaitarýmen qatar qosymsha qurylys-tehnikalyq jáne qarjylyq-ekonomikalyq saraptamalar júrgizýdi, ǵimarattyń jobalyq jáne atqarýshylyq qujattaryn, burynǵy tekserýler men anyqtalǵan aqaýlarǵa qatysty materialdardy suratýdy, sondai-aq ǵimarattyń jaǵdaiy týraly burynnan habardar bolǵan adamdardy anyqtap, jaýap alýdy surady.
Alaida sýdia Merýert Abaeva qorǵaý tarapy keltirgen ýájder isti prokýrorǵa qaitarýǵa negiz bolmaitynyn aitty. Sottyń pikirinshe, qosymsha dáleldemelerdi zertteý, kýálardan jaýap alý jáne saraptama taǵaiyndaý máseleleri isti sotta qaraý barysynda sheshilýi múmkin.
Sot qorǵaýshynyń qylmystyq isti prokýrorǵa qaitarý týraly ótinishin qanaǵattandyrýdan bas tartty. Qaýly jeke tártippen shaǵymdanýǵa jatpaidy. Isti qaraý jalǵasady.
Aita keteiik, sotta kýáger retinde jaýap bergen Dilnaz Baizakova oqiǵa kezinde Uldana Myrzýannyń janynda bolǵanyn aitty. Onyń sózinshe, jedel járdem brigadasy qabyrǵa qulaǵany týraly shuǵyl shaqyrtýǵa kelgen. Úiindi astynda er adam men áiel adam jatqan, meditsina qyzmetkerleri olarǵa kómek kórsete bastaǵan. Sol sátte joǵarydan qaitadan kirpishter qulai bastaǵan. Baizakova Uldanaǵa qaraǵan kezde onyń aýyr jaraqat alǵanyn kórgenin aitty. Kýágerdiń sózinshe, marqumnyń qulaǵy men murnynan qan aqqan. Oqiǵadan keiin Baizakovanyń ózi de aýrýhanaǵa jetkizilip, miy shaiqalǵany, jabyq bas-mi jaraqaty jáne amneziia diagnozy qoiylǵan. Kýáger bul oqiǵany aityp berý kezinde sot zalynda kóz jasyna erik berdi.
