Dostyq máńgilik
Abai Andabai, «Bizben birge» qoǵamdyq birlestiginiń tóraǵasy:
– Qazaqstan men Qyrǵystan keleshekte ózara qarym-qatynastarynyń ary qarai dami túsetinine eki eldiń sarapshylary senim bildirip otyr. Eki el arasynda saýda-ekonomikalyq kelisim bar. Qazaqstannyń ońtústik egin alqaby Naryn GES-iniń sýymen qamtamasyz etilse, Qazaqstan kyrǵyz eline elektr energiia, kómir jáne mazýt berip keledi. Budan basqa, Qazaqstannyń Ystyqkól jaǵalaýynda óz pansionattary da bar. Ǵasyrlar boiy jalǵasqan eki jaqty bailanysty Almazbek Atambaevtiń da málimdemesi úze almasy anyq. Sebebi, tamyry tereńge jaiylǵan, tarihy ortaq eki memlekettiń dostyǵy máńgilik.
Aigúl Álisher, Qazaqstannyń Jastar Kongresi OQO filialynyń basshysy:
– Qyrǵyzstan men Qazaqstan qarym-qatynasy resmi túrde jaqsy damyǵan. Kólik tranziti, eńbek kóshi-qon máselesi de jolǵa qoiylǵan. Eki el arasyndaǵy bailanystyń odan ári dami túsetine kúni keshegi eki eldiń Úkimet basshylarynyń kelissózi negiz bolatyny sózsiz. Shekaradaǵy erkin qatynasty qamtamasyz etken osy jolǵy kelissóz óz missiiasyn oryndady. Jalpy men Qazaqstan azamaty retinde eki memlekettiń arasyna syzat túsirgisi keletin bázbir azamattardyń áreketin túsinbeimin. Jalǵan ne aram piǵyldaǵy áreketter men espe áńgimeler ǵasyrlar boiy jalǵasyp kele jatqan qazaq-qyrǵyz qatynasyna nuqsan keltire qoimasy anyq. Qaita eki memlekettiń birligin bekemdep, yntymaǵyn nyǵaitýǵa úles qosý qajet. Qyrǵyzdyń janashyry qazaq, al qazaqtyń janashyry qyrǵyz halqy ekenin jadymyzdan shyǵarmaýymyz qajet.
