10 tamyz kúni Almatyda ótetin Djennifer Lopestiń kontserti Qazaqstan ekonomikasyna 5 milliard teńge tabys ákeledi. Bul týraly Astana Concert prodiýseri Malik Hasenov málimdedi, dep habarlaidy Dalanews.kz.
Onyń aitýynsha, shoýǵa 29 elden kórermender bilet satyp alǵan: kontsertke TMD elderinen bólek, AQSh, Ulybritaniia, Germaniia, BAÁ, Saýd Arabiiasy, Shveitsariia, Qytai, Túrkiia jáne Meksikadan da qonaqtar keledi.
«Mundai deńgeidegi sharalar – Qazaqstanda, sonyń ishinde Almatyda, oqiǵalyq týrizmniń qozǵaýshy kúshi. Qala ákimdiginiń týrizm basqarmasynyń málimeti boiynsha, árbir týrist keminde 3–5 kúnge kelip, orta eseppen 1500 dollar jumsaidy. Eger 8000 týrist bir mezgilde kelip, osyndai kólemde shyǵyndansa, onda HoReCa salasyna – iaǵni qonaqúiler, meiramhanalar, kafe, ekskýrsiialar jáne kontsert biletteri esebinen shamamen 5 mlrd teńge túsedi. Bul – tek 10 tamyzdaǵy kontserttiń úlesi», – dedi Hasenov.
Ol sondai-aq sheteldik kórermenderdiń osyndai shoýlarǵa degen qyzyǵýshylyǵy týristerdi tartýda mańyzdy ról atqaratynyn atap ótti.
«Djennifer Lopes – bul bolashaqtaǵy is-sharalarǵa jol ashatyn kontsert. Biz, múmkin, shildeniń basynda, 1 shilde kúni, sizderdi taǵy bir úlken jańalyqpen qýantatyn bolamyz», – dep ýáde berdi Hasenov.
Buǵan deiin Malik Hasenov ánshiniń Astanadaǵy kontserti el ekonomikasyna 6,5 mlrd teńge ákeletinin aitqan edi.
Juldyzdyń kontserti 10 tamyz kúni Almatydaǵy Ortalyq stadionda ótedi. Buǵan deiin, 1 tamyzda Djennifer Lopes Astanadaǵy «Astana Arena» stadionynda óner kórsetedi.
