Quqyq qorǵaýshy Evgenii Jovtis Táýelsizdik mereitoiyna orai abaqtydaǵy jeńil jaza alǵan tutqyndardyń birazy merziminen buryn bosaitynyn aitty dep habarlaidy Dalanews.kz 31 arnanyń “Informbiýro” jańalyqtaryna siltep.
Al qarapaiym turǵyndar munyń sońy qylmystyq ahýaldyń ýshyǵýyna alyp kele me dep alańdaidy.
Raqymshylyq týraly zań jobasyna sai qoǵamǵa qaýip tóndirmeitin, jasaǵan qylmysy aýyr zardapqa uryndyrmaǵan tutqyndarǵa raqymshylyq jasalýy múmkin. Ázir atalǵan zań jobasyn halyq qalaýlylary qarastyrýda.
Zalaldy tolyqtai ótegen, ózin jaqsy qyrynan kórsetken jáne bostandyqqa shyǵýyna bir jyldyń mańaiyndaǵy merzimi qalǵan azamattar raqymshylyqqa ilige alady.
Osynaý talapqa sáikes Sochi Olimpiadasynyń júldegeri, konkishi Denis Tenniń isi boiynsha aiyptalǵan Janar Tolybaevaǵa raqymshylyq jasalýy múmkin.
Ol qylmys týraly quqyq qorǵaý organdaryna habarlamaǵany úshin 4 jylǵa sottalǵan. Bir jyldan keiin sot úkimdi jeńildetip, ony úi qamaqqa aýystyrǵan. Alaida osy jyldyń sáýir aiynda álgi sheshimniń kúshin joiyp, Tolybaevany qaitadan abaqtyǵa qamady. Janar koloniiada bosandy.
“Janar? Oǵan raqymshylyq jasaýǵa kedergi bolarlyq sebep joq, ilinip ketýi múmkin. Raqymshylyqtan úreilenip otyrǵan keibir azamattarǵa aitarym, qorqýǵa negiz joq. Sottalǵandar úshin abaqtydaǵy ómir sabaq boldy, olar qaita oralǵysy kelmeidi. Degenmen buǵan 100 paiyz kepildik bere almaimyz, sondyqtan memleket bul máseleni retteýi kerek”, – deidi zańger Jovtis.
Aita ketelik, Táýelsizdiktiń 30 jyldyq mereitoiyna arnap jasalatyn raqymshylyq – korrýtsionerlerdi, lańkesterdi, qylmystyq toptardyń serkelerin jáne pedofilderdi ainalyp ótedi. Osy 30 jylda elimizde 8 ret raqymshylyq jasalyp, 50 myń adam bostandyqqa shyqty.
https://www.youtube.com/watch?v=ODj-KbX9RKA
