BUU ókili: «Qazaqstan genderlik saiasatty júieli júzege asyrýda»
«Qazaqstanda áielder erlerge qaraǵanda 33% az jalaqy alady, bul kórsetkish jahandyq normadan joǵary. Bul elde áielder joǵary laýazym ielenip, ǵylym, injeneriia sekildi aqshasy kóp qyzmetterde istei almaidy, jeke kásibin basqarý múmkindigi de joq. Qazaqstanda, jalpy Orta Aziiada názik jandar úi tirligi men bala kútimine erlerge qaraǵanda 2,6 ese kóp ýaqytyn jumsaidy. Eger er adamdar osy mindetterge kóbirek ýaqyt bólse, jubailarynda da tabysty jumys isteýge múmkindik bolatyn edi», — dedi BUU ókili.
Ol eńbekaqy aiyrmasy Qazaqstannyń Ekonomikalyq yntymaqtastyq jáne damý uiymy (EYDU) men álemniń 30 damyǵan eliniń qataryna kirý jolynda óte mańyzdy másele ekenin atap ótti.
«Bul kórsetkishterge qol jetkizý úshin Qazaqstan áielderdiń jaǵdaiyn jaqsartýy kerek. Jahandyq reitingte Qazaqstan 52-orynda, bul EYDU-nyń keibir elinen joǵary. Biraq tendentsiia sonshalyqty jaqsy emes. Sońǵy eki jylda Qazaqstan úsh oryn, keiin taǵy bir oryn joǵaltty. Qazaqstan ekonomikalyq jáne saiasi salalarda áielder úshin múmkindikterdi ulǵaitqany durys. Basqa eldermen salystyrǵanda (EYDU), bul eki indikator Qazaqstanda nashar», — dep túsindirdi Konkievich.
BUU ókili jahandyq syn-qaterlerge tótep berý úshin atalǵan kórsetkishter mańyzdy ekenin málimdedi. Aitýynsha, eńbek naryǵynda áielderdiń kóbeiýi jahandyq deńgeide JIÓ mólsherin 2025 jylǵa deiin 28 trillion dollarǵa ulǵaitýǵa múmkindik beredi.
«Qazaqstanda áielderdiń sheshim qabyldaýǵa qatysý indikatory jaman emes. Májiliste – 27,1% áielder, bul jahandyq normadan da (23%) joǵary. Desek te, Qazaqstan ǵalamdyq deńgeide nebári 58-orynda tur. Basa nazar aýdaratyn taǵy bir indikator mynaý: 18 ministrdiń arasynda – bir ǵana áiel. Ókinishke qarai, bul Qazaqstandy tek 158-orynǵa qoiady. Bul óte tómen kórsetkish», — dedi ol.
Jalpy, BUU Qazaqstannyń durys baǵytta kele jatqanyn, otbasylyq jáne genderlik saiasatta jańa tujyrymdamalar qabyldanǵanyn tilge tiek etti.
