Búgin Astanada Ońtústik Qazaqstan oblysynyń kúnderi bastaldy
Ońtústik Qazaqstannyń kúnderi aiasynda oblystyń salt-dástúrin, ádet-ǵurpyn, mádenieti men bailyǵyn pash etetin 43 mádeni kópshilik is-sharasy elordalyqtar men qala qonaqtarynyń nazaryna usynbaqshy.
Ońtústik kúnderiniń alǵashqy sharasy shet el memleketteriniń Qazaqstandaǵy 30-dan astam elshileri qatysatyn biznes-forýmmen ashylady.
Bes kúnge sozalatyn dúbirli toida ońtústik qazaqstandyq óner maitalmandary «Túrki eliniń túp tamyry – Ońtústikten mereili Astanaǵa sálem!» óner kerýeni, «SálemAstana!, Sálem, EKSPO!», «Ońtústik ázilderi» shoý-kontsertterin usynsa, óńirimizdiń tarihi qundylyǵymen erekshe mádeni kelbetin dáripteitin kórnekti jádigerlerdiń kórmesi men tarihtan syr shertetin sýretshiler men qolónshiler buiymdarynyń kórmeleri ótkiziledi. Budan bólek, astanalyqtar «Báiterek» alańynda bir mezette 600 jas dombyrashynyń oryndaýyndaǵy kúidi tamashalai alady.
Al 2-3 qyrkúiek kúnderi agrarly aimaqtyń aýyl sharýashylyq jármeńkesi uiymdastyrylady. Jármeńkege naryq baǵasynan arzan quny 265 mln. teńge bolatyn 550 tonnaǵa jýyq ónim shyǵarylady.
Munan bólek, respýblika boiynsha shaǵyn jáne orta kásipkerlik sýbektileriniń sany jaǵynan kósh bastaityn Ońtústiktiń ónerkásip týarlarynyń kórmesi ótedi.
29-31 tamyzy aralyǵynda «Beibitshilik jáne kelisim» saraiynda ótetin kórmege óńirimizdiń tamaq jáne jeńil ónerkásibi, mashina jasaý, farmatsevtika jáne qurylys zattary salalarynyń 50-den astam kásiporyndary qatysady. Sondai-aq, 30 tamyz kúni saǵat 11.00-de Astana qalasynyń oqýshylar saraiynda «Kúsh atasy - Qajymuqan» animatsiialyq filminiń tusaýkeseri ótse, 31 tamyz kúni «Otyrar dastany», «Qazaqstan barysy», «Tolaǵai», «Qazaqstan brendi» animatsiialyq filmderin Astana jurtshylyǵy tamashalaityn bolady.
Demalys kúnderi «Qazanat» ippodromynda aýdaryspaq, qyz qýý, jamby atý, teńge ilý, qusbegilik jáne at ústinde óneri kórsetiletin bolsa, 3 qyrkúiek kúni «Etnoaýylda» qazaq kúresi, asyq atý, toǵyzqumalaq jáne kórermender arasynda «Qoshqar kóterý» saiysy uiymdastyrylady.
3 qyrkúiek kúni saǵat 21.30-da EKSPO alańyndaǵy amfiteatrda Ońtústikten shyqqan qazaq estradasynyń juldyzdary Nurlan Ónerbaev, Qairat Nurtas, Altynai Jorabaeva, Jubanysh Jeksenuly jáne taǵy basqa da kóptegen óner maitalmandary óner kórsetetin «Án men kúi áldileidi Astanany!» atty qorytyndy Gala-kontserti ótedi.
OQO ákiminiń baspasóz qyzmeti
