Álemde munaı baǵasynyń ósýine baılanysty Qyrǵyzstanda mamyr aıynda janar-jaǵar maı 10-15 prosentke qymbattaıdy dep málimdedi munaısatýshylar qaýymdastyǵynyń prezıdenti Qanat Eshatov.

Onyń sózinshe, jyl basynan beri álemde munaı barreli 16 dollarǵa qymbattaǵan. Al Reseıde janar-jaǵar maı baǵasy 150 dollarǵa ósken.

– Mysaly, eger osyǵan deıin AI-92 tonnasyn 460 dollardan tasyp kelsek, qazir 585 dollar boldy. Ótken aıda satyp alǵan munaı qory taýsyldy. Endi mamyr aıynda 10-15 prosentke ósedi, –dedi Eshatov.

Búginde Bishkekte janarmaı quıý stansıalarynda Aı-92 markaly benzınniń bir lıtri orta eseppen 40,5 som turady.

Qyrǵyzstan jyl saıyn shamamen 1 mln tonna janar-jaǵar maı qoldanady. Munaı Reseıden tasymaldanady. Jyl basynda Qazaqstan Qyrǵyzstanǵa aqpan aıynan bastap benzın eksporttaıdy dep málimdegen. Biraq áli sheshimi tabylmaǵan sekildi.