Baýyrjan Baıbek: «Aýtızmmen jáne basqa da mentaldy aýytqýlary bar balalarǵa arnap 8 zamanaýı ortalyq salynady»

Dalanews 25 tam. 2021 11:46 307

«Nur Otan» partıasy Tóraǵasynyń Birinshi orynbasary Baýyrjan Baıbek jańa oqý jyly qarsańynda Bilim jáne ǵylym mınıstri Ashat Aımaǵambetovpen birge «Bolashaq» korporatıvtik qory elimizde alǵash ret ınklúzıany qoldaý kabınetin ashqan elordadaǵy «Qyz Jibek» balabaqshasynda boldy, – dep habarlaıdy Dalanews.kz.

«Bolashaq» qory Qamqorshylyq Keńesiniń qurmetti múshesiniń aıtýynsha, búginde Qazaqstanda 160 myńnan astam erekshe bilim alýǵa qajettilikteri bar bala bar, onyń ishinde 35 myń bala aýtızmmen aýyrady. Sondyqtan bıyl qurylǵanyna 10 jyl tolyp otyrǵan qor jumysynyń negizgi baǵyttarynyń biri «Ár bala mektepke barýǵa laıyqty» ınklúzıvtik bilim berýdi damytý jobasy bolyp tabylady.

– Osy jyldar ishinde bolashaqtyqtardyń yqylaspen atqarǵan izgi isiniń arqasynda óńirlerde 59 mamandandyrylǵan ońaltý mekemesi ashylyp, jabdyqtaldy. Onyń ishinde 22 qalada 43 ınklúzıany qoldaý kabıneti ashyldy. Erekshe bilim alýǵa qajettiligi bar 2 myńnan astam bala qamtyldy, onyń ishinde 600 bala úıde bilim alýdan shyǵaryldy. Inklúzıvtik bilim berý salasynda 420 jańa biliktiligi joǵary jumys orny ashyldy. 2 myń maman men ata-ana arnaıy dáris aldy. Memleket deńgeıinde júıeli túrde sheshý úshin qor zańnama aktilerine 70-ten astam usynym men túzetýler engizdi, – dedi Baýyrjan Baıbek.



Sonymen birge ol «Bolashaq» qorynyń sarapshylary Nursultan Nazarbaev Qoryna turaqty túrde konsýltatıvtik qoldaý kórsetetetinin atap ótti. Ótken jyly qordyń 8 óńirde 16 ınklúzıany qoldaý kabınetin ashýy, sondaı-aq kelesi jyldyń sońyna deıin aýtızmmen aýyratyn jáne basqa da mentaldy aýytqýlary bar balalar úshin sońǵy úlgidegi úzdik tehnologıalardy endire otyryp, taǵy da 8 zamanaýı eńseli ortalyq salýdy josparlaýy mańyzdy qadam boldy.

– Erekshe qajettilikteri bar balalarǵa qoldaý kórsetý partıa Lıderi Nursultan Nazarbaevtyń budan 7 jyl buryn bastamashy bolǵan «Kedergisiz keleshek» jobasy men Memleket basshysy Qasym-Jomart Toqaev jarıa etken «Ózgerister joly: Ár azamatqa laıyqty ómir!» saılaýaldy baǵdarlamasy basymdyqtarynyń biri bolyp tabylady. «Barsha balaǵa – teń múmkindikter» qaǵıdatyn iske asyra otyryp, 2025 jylǵa deıin kolejder men joǵary oqý oryndarynda, sondaı-aq mektepter men mektepke deıingi uıymdardyń 70%-nde ınklúzıvtik bilim berýdi endirý jóninde mindet qoıyldy, – dep atap ótti partıa Tóraǵasynyń Birinshi orynbasary.


Budan bólek, partıa ońaltý ortalyqtarynyń sanyn ulǵaıtýǵa jáne erekshe qajettilikteri bar balalarǵa psıhologıalyq-pedagogıkalyq jáne korreksıalyq qoldaý boıynsha memlekettik tapsyrysty endirýge qol jetkizbek. Asyraýshysynan aırylǵan balalar bir mezgilde múgedektigi boıynsha jáne asyraýshysynan aıyrylýy boıynsha 2 járdemaqy alatyn bolady. Sonymen birge erekshe qajettilikteri bar balalar úshin kámelettik jasqa tolǵannan keıin turǵyn úıge kezeginiń úzilmeýi de qamtamasyz etiledi.



Jalpy, saılaýaldy mindettemeler aıasynda taıaýdaǵy 5 jylda erekshe qajettilikteri bar adamdar úshin taǵy da 22 myń áleýmettik ınfraqurylym nysanyn beıimdeý jalǵastyrylady. Jumysqa ornalastyrý boıynsha kvotany oryndamaǵan jumys berýshiler úshin ótemaqy tólemderi engizilip, ol erekshe qajettilikteri bar adamdarǵa jumys oryndaryn ashýǵa baǵyttalady.

«Nur Otan» maqsaty aıqyn, naqty ister partıasy retinde óz saılaýaldy ýádeleriniń barlyǵyn iske asyrýdy qamtamasyz etedi. Bul úshin partıa Lıderiniń tapsyrmasy boıynsha búginde buǵan qajetti búkil partıalyq ınfraqurylym jańasha jolǵa qoıyldy: jaýapty depýtattar men basshylar naqty bekitile otyryp, 217 jol kartasy iske asyrylyp jatyr, 12 myńnan astam belsendi azamattyń qatysýymen 1,7 myńnan astam qoǵamdyq keńesterdiń óńirlik júıesi quryldy jáne t.b. Taıaý ýaqytta saılaýaldy baǵdarlama men azamattar amanattarynyń oryndalý sapasyn tekserý úshin jergilikti jerlerde tıisti kóshpeli kezdesýler ótkiziledi», – dep túıindedi Baýyrjan Baıbek.

Usynylǵan
Sońǵy jańalyqtar