Balalyq shaqtaǵy saǵynysh
«Sońǵy qońyraý» saltanatty is-sharasy jaqyndaǵan saiyn júregim birtúrli tolqyp, kóńilim alaburtqanyn qalai jasyramyn. Sebebi, halqymyzda «Elý jylda el jańa» degen támsil bar emes pe?! Onyń astarynda osy ýaqyt aralyǵy talai tolqyndar men ózgeristerdiń oryn alyp, urpaq aýysady degen maǵynany bildirse kerek. Balqash aýdany Baq-baqty aýyly Jambyl atyndaǵy №1 orta mektebiniń direktory, aýdandyq máslihat depýtaty Hamzina Bibigúl Muhamediqyzy meniń synyptastarymdy, mektepti 40, 30, 20, 10 jyl buryn támamdaǵan túlekterdi shaqyryp, syilady. Osy arqyly óziniń kóregen basshy ekenin kórsetti. «Jaqsynyń jaqsylyǵyn ait nury tasysyn» demekshi kórsetilgen iltipatqa riiasyz rizashylyǵym, aitar alǵysym sheksiz. Elbasynyń «Bolashaqqa baǵdar: rýhani jańǵyrý» atty maqalasynda kóterilgen «Týǵan jer» baǵdarlamasynyń aiasynda atqarylǵan bul eńbegi barshamyzǵa esten ketpes sátterdi syilady. Árine, týǵan jer dúnie júziniń qai túkpirinde ómir súrseń de, eriksiz ózine qarai tartatyn kúshke ie ekenin bárimiz bilemiz. Biz synyptastarymyzben arada qansha jyl ótse de, ózara aralasyp, syilastyǵymyzdy, yntymaǵymyzdy eshqashan joǵaltqan emespiz. Osynaý dostyq sezimdi júregimizge uialatqan altyn uia – mektebimizdi de umytpaimyz.
Búginde mektebimiz gúldenip, ondaǵy oqýshylardyń 80 paiyzy ártúrli ǵylymi jáne intellektýaldyq baiqaýlardyń jeńimpazdary atanyp júr. Ol árine, ustazdardyń arqasy dep bilemin. Sebebi, munda qyzmet etip júrgen muǵalimder respýblikalyq kóptegen kásibi baiqaýlardyń júldegerleri. Alysta júrsek te, osyndai mańyzdy jańalyqtardan árdaiym qulaǵdar bolyp otyramyz. Jaqsylyǵyna marqaiamyz.
1968 jyly túlep ushqan meniń synyptastarymdy jaqsy qarsy alǵan mektep basshylyǵyna tántimin. Este qalarlyq jiyn, kóktemniń kúmis kómei sońǵy qońyraýynyń umytylmas sáti boldy. Mektep ustazdary men shákirtteri «Saǵynysh eken bala kez» atty ádebi-sazdy kesh qoiyp berdi. «Alǵashqy ustazyńyz kim?» siiaqty ótken shaqty eske túsiretuǵyn viktorinalyq qyzyqty suraqtar bal-bala kezdegi beinemizdi kóz aldymyzǵa keltirip, balalyq shaqtyń dámin qaita sezindirdi. Keshten keiin túlekterge dastarhan jaiylyp arnaiy qurmet kórsetildi. Munyń ózi isker basshy Hamzina Bibigúl Muhamediqyzynyń bizge kórsetilgen zor yqylasy, qyzmetin shyn súie biletinin dáleldedi.
Búginde meniń synyptastarymnyń kópshiligi eńbek demalysynda. Árqaisysy óz ómir joldaryn taýyp, Qazaqstannyń túkpir-túkpirinde abyroily qyzmet etken azamattar. Otbasynda aiaýly ata, ardaqty áje atanyp otyrǵan asyl jandar. «Batamenen el kógerer» demekshi, mektep ujymyna jáne basshylyǵyna barlyq synyptastarymnyń atynan qajymas qairat, ortaimas baqyt tileimin. Árdaiym eńbekterińiz janyp, tek qana biikterden ǵana kórinińizder, ainalaiyndar! «Ósirgen jemisterińiz» – shákirtterińiz bergen bilimderińizben kógersin!
Kishimbala Núsipbekova,
Balqash aýdany, Baq-baqty aýyly
№1 Jambyl atyndaǵy orta mekteptiń
1968 jylǵy túlekteri atynan
