Bul týraly ol óziniń Facebook paraqshasynda egjeı-tegjeıli jazyp, kópshiliktiń aldyna usyndy.
A.Táshenova Mamaı tarapynan keltirilgen kýálikteriniń birde bireýi taǵylǵan aıyptaýlarǵa dáleldeme bola almaıtynyn málimdedi.
Onyń sózine sensek, Mamaıdyń usynǵan dálelderi posttardan, BAQ pen anonımdi telegram-arnalardaǵy jarıalanymdardan, sondaı-aq túsiniksiz anyqtamalar men iske múldem qatysy joq qujattardan turatyn qoıyrtpaq. Zań men zańı tájirıbe turǵysynan alǵanda, bul – sot úshin eshqandaı mańyzy joq paıdasyz jalǵan dáleldemeler.
«Sot talqylaýy – eń aldymen faktiler ekenin taǵy da atap ótkim keledi. Sot jalań joramaldar men «qıalı áńgimelerge» emes, tek solardyń negizinde ǵana zańǵa sáıkes aqıqatty anyqtaıdy. Bul – álemdik tájirıbe, quqyq ústemdigi degenimiz de, osy», – dep túsindirip ótti Baıbektiń qorǵaýshysy.
Advokattyń jazbasynan zańǵa sáıkes jaýapkerler jarıa túrde aıyptaý kezinde súıengen qujattary men rastaıtyn dáleldemelerin sotqa usynýy tıis ekeni belgili boldy. Áıtse de, B.Baıbek, 2 kún buryn sotqa J.Mamaı men I.Imanbaevanyń jalǵan aıyptaýlaryn joqqa shyǵaratyn barlyq qajetti qujattar men faktilerdi joldaı otyryp, óz quqyǵyn paıdalanypty.
Zańger A.Táshenova jaýapkerlerdiń 16 bettik pikirine qysqasha toqtalyp, olardyń «dáleldeme» dep usynǵandary men talapkerler bergen qujattardy salystyryp 7 tarmaqqa bólip kórsetti.
Osy túıinderden Baıbektiń qorǵaýshysy Mamaı usynǵan dálelderdiń barlyǵy feık aqparat jáne jalǵan faktilerden quralǵanyn alǵa tartty.
«Budan aldyn B.Baıbek óz suhbatynda málimdegendeı, olardyń «jýrnalısik zertteý» dep atalatyny tolyqtaı ótirik tujyrymdarǵa, ashyqtan ashyq kemsitýge, aldaý men qoǵamdyq pikirdi manıpýlásıalaýǵa qurylǵan. Iaǵnı olardyń «qujattamasy» túkke turmaıdy, al barsha ótirik aqparaty aýadan alynǵan.
«J.Mamaı men I.Imanbaeva osyndaı tuıyqqa tirelip otyrǵan jaǵdaıda ne istemek? Kórip otyrǵanymyzdaı, proses barysynda J.Mamaı men I.Imanbaeva jáne olardyń úsh advokaty ózderiniń aıyptaýlary kópe-kórneý jala men arsyz aldaýǵa qurylǵanyn bile tura, erte bastan «ózderiniń jeńilgenin moıyndady».
Áıtse de, las tásilder men tehnologıalardy paıdalana otyryp, jaýapkerler sanaly túrde qoǵamdyq pikirdi burmalaı otyryp, talap qoıýshyny qaralaıtyn ótirik aqparatty taratýyn jalǵastyrýda. Al proses barysynda sotty «sózbuıdaǵa salyp», arzan qoıylymǵa aınaldyryp, talap aryz mánine jatpaıtyn basqa taqyryptardy qozǵap ketýde», – dep qorytyndylady advokat.
Talap qoıýshy ózderiniń durystyǵyna áýel bastan-aq senimdi bolǵanyn atap ótti. Ózderiniń pozısıasyn rastaý maqsatynda barlyq dálelder men qujattardy barshanyń tanysýy úshin jarıalaǵanyn jetkizdi. Al jaýapkerler tarapyn ózderiniń «dáleldemeler» dep atalatynyn ashyq usynýdan tolyqtaı qashqaqtap júrgenin ashyq aıtty.
