Eki myqtynyń eregesi bir-birin ashyq aiyptaýǵa ulasyp jatyr. 24.kg-ǵa suhbat bergen Jienbekov ázir Sotsial-demokratiialyq partiianyń tizginin ustap otyrǵan Atambaevtyń ózine orynsyz kiná taqqanyn aityp, aǵynan jarylypty.
– Kórispegenimizge kóp boldy. Sońǵy ret sonaý naýryz aiynda ushyrasqanbyz. Sodan beri maǵan san ret kúie jaqty. Prezidenttiktiń alǵashqy tórt aiyn aýyr ótkerdim. Sol kezde qoltyǵymnan demeýdiń ornyna, syrtymnan sóz tasydy.
"Jemqorlyqtyń ushar basynda turǵan Jienbekov, Pishkektegi jylý elektr ortalyǵynyń apatyna da sol kináli" desti.
Sotsial-demokratiialyq partiianyń sezine osy uiymnyń otymen kirip, kúlimen shyqqan Osh óńirinen kelgen ardagerlerdi kirgizbei, bosaǵadan keri qaitardy.
Qiyn-qystaý jyldary partiiany saqtap qalýǵa qol ushyn sozǵan, ári Atambaevty da aman alyp qalǵan solar emes pe edi? Jaǵdaidy osynshalyqty ýshyǵady dep oilaǵan joqpyn. Osy ýaqytqa deiin tis jarǵam joq. Almazbekten irgemdi aýlaq salam degen oi joq-tuǵyn. Partiialas edik, múddeles edik osy kúnge deiin.., – degen Jienbekov partiia qatarynda júrgende Atambaevqa adal qyzmet etkenin aitypty.
"Alaida Almazbektiń qolbalasy emespin" deidi Qyrǵyzstannyń qazirgi prezidenti.
"Menen qolbala jasaýǵa tyrysyp, kóldeneń kók attylardyń kómegimen is-áreketimdi óziniń qolaiyna qarai baǵyttaýǵa umtylý Atambaevqa abyroi ákelmeidi. Onyń osy arqyly nege umtylatynyn uǵyna almai-aq qoidym. Bir ózi bar aýyrtpalyqty moinymen kótergendei sóileidi. Sotsial-demokratiialyq partiiany búgingi deńgeige jetkizgen tulǵalardy sanattan shyǵaryp tastady. Partiianyń búgingidei deńgeige jetýi jalǵyz Almazbektiń arqasy emes. "Dosym", "partiialasym" degende sondai. Sózi men isi sai emes, biraq. Naǵyz dos, naǵyz partiialas dál Almazbektei pasyq piǵylǵa barmaidy, – depti kúiingen Jienbekov.
Aitýynsha, nebir almaǵaiyp zamanda Atambaevtan alystamai, janynda júripti Jienbekov.
"Basyna kún týyp, japadan jalǵyz qalǵan kezderi de qasynan tabyldym. Ol tustary Atambaevtyń úzeńgilesi bolý basyńdy báigege tigýmen teń edi. Soǵan qaramai, otbasyma, týǵan-týysqa tónip turǵan qaýipke qaramai Almazbektiń aitqanyna sendim.
2009 jyly Atambaev Sotsial-demokratiialyq partiianyń atynan sailaýǵa túskende onyń oń qoly bolǵan shtabqa jetekshilik ettim. Sol kezdegi júie Atambaevqa jaqtasqandardyń terisin tiridei sypyrýǵa ázir-tuǵyn. Almazbektiń sózin sóileý kózsiz erlik edi sol tustary. Ashyǵyn aitaiyn, Atambaevtyń jolynda ajal qushýym da múmkin edi. Ol úshin qandai qurbandyqqa barǵanymdy Almazbek jaqsy biledi.
Sonyń bárin umytyp ketti. Meni satqyn dep sybap júr. Almazbek pen onyń jaqtastarynyń súiikti sóz bul. Kórermiz. Kimniń kim ekenin ýaqyt kórsete jatar...", – depti Jienbekov.
Aitýynsha, dál qazir onyń Atambaevtyń aiyptaýlaryna alańdaityn ýaqyty joq.
"Qyrǵyz halqynyń máńgilik muraty bar. "Qyrǵyz kóshi óz jolyn jalǵastyrýy kerek". Meniń uranym, meniń ustanymym osy. Prezidentter keledi ketedi, halyq qalady. Táýelsizdik atty tarihi joldy jalǵastyrýymyz kerek", – depti Jienbekov.
Daiyndaǵan, Dýman BYQAI
