Astanada júzden astam ata-ana “Ǵasyr” bilim berý ortalyǵyna aldanyp qaldy. Balalaryn shetelde oqytamyz degen ýádemen milliondap aqsha jinaǵan oqý orny aiaq astynan jumysyn toqtatyp, basshylary izim-ǵaiym joǵalǵan, dep habarlaidy Dalanews.kz 31-arnaǵa silteme jasap.
Jábirlenýshilerdiń aitýynsha, ár ata-ana orta eseppen 1,5–2 million teńge kóleminde aqsha tólegen. Alaida ýáde etilgen bilim berý qyzmeti tolyq kórsetilmegen: sabaqtar júieli ótpegen, daiyndyq kýrstary úzdiksiz júrgizilmegen. Soǵan qaramastan ata-analardyń keibiri kelisimshart ta jasaspai, ortalyqtyń bedeline senip, birden tólem jasaǵan.
“Politsiiaǵa aryzdandyq. Sebebi bizde kelisimshart bar. Olar sol kelisimshart boiynsha ýádelerin oryndamady. Osy oqý ortalyǵynyń bas direktoryna habarlastym. Ol qazir bul jerde jumys istemeitinin aitty. Al ornyna jańadan kelgen adam telefonǵa jaýap bermeidi”, – deidi Astana qalasynyń turǵyny Baqyt Kúderbekova.
Tipti ata-analarǵa ortalyqtyń jabylatyny týraly aldyn ala esh eskertý jasalmaǵan. Keibireýler eki balasyn qatar oqytpaq bolyp, qosymsha shyǵynǵa batqan. Solardyń biri – Ainagúl Nurmaǵambetova. Ol "Ǵasyrdyń" repýtatsiiasyna sengendikten aqshany kelisimshartsyz tólegen.
Qazir ortalyqtyń esigi jabyq, ǵimaratqa politsiia mór basqan. Jalǵa berýshi tarap oqý orny ai saiyn 4,5 million teńge jaldaý aqysy tólep turǵanyn, biraq sońǵy ýaqytta 6 million teńgeden astam qaryz jinalǵanyn aitady. Al ortalyq basshylyǵymen bailanys ornatý múmkin bolmai otyr.
Ata-analardyń ujymdyq aryzy negizinde politsiia Qylmystyq kodekstiń 190-baby – “Alaiaqtyq” boiynsha qylmystyq is qozǵady.
“Tergeý barysynda azamattar aqsha tólep, alaida kelisilgen bilim berý qyzmetin tolyq almaǵany anyqtaldy. Qazirgi tańda sotqa deiingi tergeý júrgizilip jatyr”, – dedi Esil aýdandyq politsiia basqarmasy bastyǵynyń orynbasary Erjan Quraqbaev.
