Astana qalasynda qaza tapqan adamdy jerleý rásimderin atqarý úshin qomaqty qarajat kerek. Bul týraly Májilis depýtaty Samat Nurtaza málimdedi, dep habarlaidy Dalanews.kz.
"Búgin jerleý rásimi týraly aqparat bildim. Astana qalasyna ǵana qatysty baǵalar.
Baiaǵyda jaqynyń qaitys bolǵanda, bireý bazarǵa órik-meiiz izdep ketetin, bireý moldany shaqyrýǵa ketetin, bireý jer izdep ketetin, bireý jylqy soiýǵa zymyraityn. Qazir naryq zamanynda “pohorony pod kliých” degen qubylys bar eken.
Jaqynyń qaitys bolǵanda, politsiiaǵa habarlasasyń. Politsiiamen birge Jedel Járdem kelip, jaqynyńnyń óz ajalymen qaitys bolǵanyn rastaidy. Sosyn “Ólim týraly kýálik” beriledi.
Jerleýmen ainalysatyn firmalarǵa habarlassań, olarda máiitti jýatyn arnaiy oryn men jýatyn adamdary, marqumdy oraityn matasy, ziratqa deiin orap aparatyn kilem, jerleýge deiin saqtaityn holodilnik, ziratqa deiin aparatyn katafalk kóligi de daiyn. Meshitten shyǵaramyn deseń de, meshit pen imam daiyn", - dep jazdy májilismen.
Onyń dereginshe, jer de sol baǵaǵa kiredi. Qostanai trassasynda iaki Pavlodar trassasyndaǵy eki zirattyń bireýin tańdai alasyz. Kór qazý 4-5 saǵat ýaqytty alatyn kórinedi. Joǵaryda jazylǵannyń barlyǵyna 450-500 myń tg ketedi.
"Endi restoran. Restoran ár adamnyń óz shamasyna qarai, biraq sol firmaǵa “Asyn jasap ber” deseńiz, sizge eki baǵa usynady. Eger etti ózińiz ákelseńiz, Adam basyna 8 myń tg. Oǵan kámpit, órik-meiiz itd kiredi. Eger et restorannan bolsa, Adam basyna 15 myń tg. Ol kezde siz tek aqsha tólep, kelgen-ketken adamdardyń kóńil aitqanyn qabyldap turasyz. As aiaqtalǵan soń, dastarhanda qalǵan tamaqtyń bárin ákete alasyz.
Zirat salý: Ziratty 40 kúnde salyp bitiremiz dedi. Jái temirmen qorshap, tórt jaǵyna musylmannyń belgisi ai men juldyzdardy ornalastyrý - 350 myń tg. Al biiktigi 140sm aq kirpishten qorshalǵan zirat salý - 800 myń tg. Ary qarai fantaziiańyz ben qaltańyz shydasa, baǵa óse beredi. Granit, mramor itd.
Qysqa qaiyrsaq, Astana qalasynda bir adamdy jerleý - 1.500.000tg shamasynda shyǵyp tur. Týysqany az, jalǵyz-jarym adamdar úshin, bul da sheshim dep oilaimyn", - delingen depýtattyń jazbasynda.
