Memleket basshysy Qasym-Jomart Toqaev Qazaqstan halqy Assambleiasynyń HHHIV sessiiasyna qatysty, - dep habarlaidy Dalanews.kz.
Qasym-Jomart Toqaev basqosýdyń tarihi mán-mańyzy airyqsha ekenin málimdedi.
"Biyl Qazaqstan halqy Assambleiasynyń qurylǵanyna 30 jyl tolyp otyr. Barshańyzǵa qutty bolsyn! Bul – búkil Qazaqstan úshin aitýly oqiǵa. Osy ýaqyt ishinde Assambleia qoǵamdaǵy turaqtylyq pen kelisimdi nyǵaitýǵa ólsheýsiz úles qosty. Elimizdegi birlik pen teńdiktiń, turaqtylyq pen tynyshtyqtyń simvolyna ainaldy. Etnosaralyq qatynas salasyndaǵy teńdessiz qoǵamdyq institýt retinde tanyldy. Sonyń arqasynda Qazaqstanda beibitshilik pen kelisimniń qaitalanbas úlgisi qalyptasty. Assambleia tarihy elimizdiń egemendik jylnamasymen tyǵyz astasyp jatyr. Uiym 1995 jyly Qazaqstannyń tuńǵysh Prezidenti Nursultan Nazarbaevtyń bastamasymen qurylǵanyn bilesizder. Bul bastama qazaq memlekettiligi qalyptasyp jatqan qiyn kezeńde tereń saiasi mánge ie boldy.
Konsýltativtik-keńestik organ retinde jasaqtalǵan Assambleiaǵa 2007 jyly konstitýtsiialyq mártebe berildi. Uiym jalpyulttyq birliktiń negizgi modeline ainaldy. Elimizde sońǵy jyldary atqarylǵan aýqymdy ózgeristerdiń arqasynda Assambleia qyzmeti jasampazdyqtyń jańa sipatyna kóterildi. Senattyń bes depýtatyn Assambleia keńesiniń usynysymen Prezident taǵaiyndaidy. Bul qadam zańnamalyq deńgeide barlyq etnostyń múddesin qorǵaý múmkindigin edáýir arttyrdy. Oǵan qosa, Qazaqstan parlamentarizmi tarihynda alǵash ret «Bir el – bir múdde» atty palataaralyq depýtattar toby quryldy. Bul top qoǵamdyq kelisimdi nyǵaitý máselelerimen ainalysady. Qazir memlekettik organdar túgel Assambleia jumysyna atsalysady. Ministrlikterden, oblys ákimdikteri men barlyq deńgeidegi máslihattardan bastap aýyl ákimdikterine deiin odan shet qalmaidy", - dedi Prezident.
Memleket basshysy Assambleia qoǵamdyq uiymdarmen jáne institýttarmen tyǵyz bailanysta jumys istep, elimizdiń ishki saiasatyn júzege asyrýǵa belsene atsalysyp kele jatqanyn aitty.
"Osylaisha, memleket pen qoǵam arasynda syndarly ári jemisti dialog ornatýǵa yqpal etýde. Qazaqstan halqy Assambleiasynyń 12 múshesi Ulttyq quryltai quramynda tabysty eńbek etip, eldik bastamalarǵa óz úlesin qosyp jatyr. Assambleia sessiiasy jyl saiyn ótedi. Onda qabyldanǵan sheshimderdi memlekettik organdar mindetti túrde eskerýge tiis. Sessiialar aralyǵyndaǵy jumysty Assambleia keńesi atqarady.
Onyń quramyna etnomádeni birlestikterdiń ókilderi, qoǵam qairatkerleri, Parlament depýtattary, ministrler men ákimder kiredi. QHA Hatshylyǵy Prezident Ákimshiliginiń derbes qurylymdyq bólimi sanalady. Barlyq óńirde Dostyq úii bar. Onda myńnan astam etnomádeni birlestikter ornalasqan. Sondai-aq oblys ákimdikterinde «Qoǵamdyq kelisim» memlekettik mekemeleri quryldy. Assambleia qurylymynda tórt myńnan astam qoǵamdyq uiym jumys isteidi. Bul uiymdardyń maqsaty – bir, bul – azamattarymyzdy eldik mańyzy bar jumysqa tartý, iaǵni ortaq iske jumyldyrý. Mysaly, Aqsaqaldar keńesi men Analar keńesi otbasy institýtyn nyǵaitýǵa, jalpyulttyq qundylyqtardy dáripteýge atsalysyp, aýqymdy jumys júrgizýde", - dedi Toqaev.
