Elorda turǵyny 21 jastaǵy Ulan Musaev Aqmola oblysyna qarasty Shýchinsk qalasyndaǵy Sh.Ýálihanov atyndaǵy áskeri kolledjge oqýǵa baryp, bir jyldan keiin múgedek bolyp úiine oraldy. Eki jyldan beri arbaǵa tańylǵan balasynyń bas súiegine ota jasata almai júrgen anasy Gúlmira Muqajanova habarlasyp, kómek suraǵan, - dep habarlaidy Dalanews.kz Massaget.kz-ke siltep.
Gúlmira Muqajanovanyń eki uly bar, joldasy ómirden ótip ketken. Jalǵyzbasty áiel bas shaharda páter jaldap turady. Tuńǵyshy Ulan 11-synypty aiaqtaǵannan keiin ýniversitetke tapsyryp, IT salasynda oqýǵa túsedi. Birinshi kýrstan keiin óz qalaýymen áskeri kolledjge aýysady.
"Ulym qazir 21 jasta, 2021 jyly Shýchinsk qalasyndaǵy Sh.Ýálihanov atyndaǵy kadet kolledjine óz qalaýymen oqýǵa tústi. Kolledjde bir jyl oqyp, kanikýlǵa úige kelgen kezde kóńil kúii bolmady. "Balam, kóńil kúiińe ne boldy?" dep surap edim, fizikalyq normativti tapsyra almai qinalyp júrgenin aitty. Úige kelgennen keiin júgirip, daiyndalyp júrdi. Úsh shaqyrymǵa júgirý normativin tapsyra almai júrgen eken. Tamyzdyń biri demalysqa kelip, 29-y kúni qaita oqýǵa ketti. Eki kún ótkennen keiin saǵat toǵyz shamasynda kadet korpýsynyń basshysy habarlasyp: "Balańyzdyń jaǵdaiy aýyr, tez jetińiz. Kelgennen keiin jaǵdaidy aitamyz" dedi. Sodan baýyrym men balam úsheýmiz Shýchinskige jolǵa shyqtyq. Barsam, balam reanimatsiiada jatyr. Munarada (vyshka) turǵan kezde basynan oq jaraqatyn alǵan. Kadet basshysynyń aitýynsha, Ulan ózin-ózi avtomatpen atqan. Sodan beri eki jyldan asa ýaqyt ótti, kináliler áli tabylmady", - dedi Ulannyń anasy.
Munarada avtomatpen atqan
Ulan Musaevqa 105-baptyń 1-bóligi sýitsid jaǵdaiyna jetkizý baby boiynsha is qozǵalǵan. Biraq ony sýitsid jaǵdaiyna kimniń jetkizgeni aitylmaidy. Munaraǵa eki metr jetpei ornalasqan kamera belgisiz sebeptermen dál sol kúni isten shyqqan. Odan bólek, oqiǵa bolǵan jerde zattardyń orny aýysqan deidi.
"Ulym tolyq esin áli jinaǵan joq, kei sátterdi bilse, keibirin umytyp qalǵan. Áskerge baryp múgedek bolyp qaitqan Erbaiannyń aǵasy Naýryzbai úige kelgende ǵana alǵash ret ulymnyń kózinshe qaiǵyly oqiǵany tikelei efirde aitty. Sodan ulymnyń esine sol kún túsken bolý kerek, men tergeýshige baryp kelgenimde: "Meni kim atqanyn suradyń ba?" dep qaitalai berdi. Onyń tilin men ǵana túsinemin, sodan ekeýmiz qosylyp jylap aldyq. Balamnyń kózinshe eshteńe aitpaityn edim. Basyna massaj jasaǵan kezde "basyńda tyrtyq bar eken, kórinip tur" desem, tańǵalyp, "basymda tyrtyq joq, joq bolǵan" deidi. Jady kishkentai balanyki siiaqty, keide erkeleidi. Dene múshesinen oń jaq qolyn ǵana aqyryn kótere alady, sol jaǵy álsiz", - deidi Gúlmira Muqajanova.
"Iste kýáger paida boldy"
Astana qalasyndaǵy neirohirýrgiialyq ortalyqtyń mamandary basyna ota jasaýǵa áli erte dese, áskeri gospitaldaǵy neirohirýrg súiek saldyrý qajet ekenin aitqan. Qorǵanys ministri Rýslan Jaqsylyqovtyń qabyldaýynda bolyp, ulynyń otasyna kómek kórsetýdi suraǵan eken. Biraq ministr "aqsha joq" dep shyǵaryp salǵan. Densaýlyq saqtaý vitse-ministri de qurǵaq ýádemen shyǵaryp salǵan. Bir qyzyǵy, araǵa eki jyl salyp ulynyń isine qatysty kýágerler tabylady.
"Eki jyldan keiin ulymnyń qasynda bolǵan jigit oqiǵanyń qalai bolǵanyn aityp berdi. Ol jigittiń aqparatyna súiensek, №3 vzvod komandiri Qasiet Sairanov muny qorqytqan bolýy kerek. 29 tamyz kúni vzvod komandiri eńbek demalysyna shyǵý kerek bolǵan eken, biraq fizikalyq normativti tapsyra almaǵan 4 bala úshin demalysqa shyǵa almai qalǵan. Sodan eki kún boiy tórt stýdentke kadet kolledjiniń aýmaǵyn jinatyp, aiamai jumysqa salǵan. Kýáger balaǵa sotqa barǵanda osy sózińnen tanbaisyń ǵoi dep edim, kýá bolamyn dedi. Bireý atpasa da, balamdy osy jaǵdaiǵa jetkizip, qinap jibergen shyǵar", - dedi anasy.
Sondai-aq Ulan anasynan emtihanǵa ball qoidyramyn dep on myń teńge alǵan. Komandirdiń týǵan kúnine dep taǵy aqsha suraǵan.
"Sairanovtyń týǵan kúnine 15-20 myń teńgeden aqsha jinadyq. Olar poligonǵa barǵanda azyq-túlik alyp, káýap pisirip, pleisteishn oinap júrgen. Ulym kolledjde bilim aldy dep aita almaimyn. Qorǵanys ministri balamdy qalai sap-saý jiberdim, sol kúiin qaitaryp bersin. Reabilitatsiialyq ortalyqqa ornalastyrýǵa kómek berse degen tilegim bar. Ulymdy olardyń qolyna bere almaimyn, áskeri gospitalde qalai qaraityndaryna senimim joq. Neirohirýrgiia ortalyǵy ota jasamaimyz deidi. Eki jyl boldy, qajyp kettim", - dep kóz jasyn toqtata almady ábden amaly quryǵan Ulannyń anasy.
Qorǵanys ministrliginiń jaýaby
Qorǵanys ministriniń tárbie jáne ideologiialyq jumys jónindegi orynbasary Shaih-Hasan Jazyqbaevtan Senat kýlýarynda Ulan máselesi týraly suradyq. Ministrlik ókili on kún buryn Gúlmira Muqajanovany qabyldaǵandaryn alǵa tartty.
"Anasy ótken aptada ózim qabyldadym. Barlyq muqtajyn tolyq tyńdadyq, tergeý amaldary áli de júrip jatyr. Ulan óz-ózine qol jumsady ma, álde basqa jaǵdaida jaraqat aldy ma, áli belgisiz. Qylmystyq is aiaqtalǵannan keiin qandai tólem beriletini anyqtalady. Qorǵanys ministrliginiń atynan Densaýlyq saqtaý ministrligine hat joldadyq. Tiisti organdardan kvota berýdi surap, qarasha aiynda áskeri gospitalǵa jatqyzatyn boldyq", - dedi Jazyqbaev.
Eldegi eń myqty neirohirýrg ne deidi?
Ótken apta Gúlmira Muqajanova Ulanmen birge elimizdegi eń úzdik neirohirýrg Myńjylqy Berdiqojaevtyń qabyldaýynda bolǵan. Dáriger ota jasalǵanymen balanyń aiaqtan turyp ketýine kepildik bere almaitynyn aitqan.
"Myńjylqy myrza telefon arqyly jaǵdaiymdy aityp edim, bir sózge kelmei, tegin qabyldady. Ulymnyń áli de reabilitatsiiadan ótkeni durys dedi. Sebebi ota jasalǵanymen ol keri áserin berip, densaýlyǵy odan saiyn nasharlap ketýi de múmkin eken. Joq, sonda da ota jasatamyn deseńiz, "Prezident is-basqarmasy meditsinalyq ortalyǵynyń aýrýhanasynda aqyly túrde jasaimyz, ota quny - 8 mln teńge" dedi. Birinshiden, meniń ondai qarajatym joq. Ekinshiden, ota balamnyń densaýlyǵyna oń nemese keri áser etetini belgisiz bolǵandyqtan, ulymnyń ómirin qaterge tigip, táýekelge bara almaimyn", - dedi ol.
