A.Sarym Jer reformasy jónindegi komissiianyń tórt jumys tobyn biriktirýdi usyndy
Onyń aitýynsha, komissiia músheleri elimizdiń barlyq óńirin aralap shyǵamyz dep sheshken.
– Búgin tórtinshi óńirge kelip otyrmyz. 25 adamnan úshke bólinip, aralasaq, tamyz aiynyń sońyna deiin biraz jerdi aralap ótýge bolatyn siiaqty. Menińshe, muny kópke sozbai jasaǵanymyz durys, – dedi ol.
Osy oraida komissiia múshesi óziniń naqty usynysyn jetkizdi.
– Bizde tórt jumys toby bar. Qarap otyrsaq, olar bir máseleni qarastyryp otyr. Meniń oiymsha, bir top qurý kerek. Onyń ishine 7-8 adam kirsin. Zańdy da, naqty usynysty da 75 adam daiyndamaidy. Sondyqtan 7-8 adamdy jumystan bosataiyq. Aqylbek Kúrishbaev pen Muhtar Taijandy teń tóraǵa qylyp, bir top jasaiyq. Olar Astanada otyryp, jumys jasai bersin, al biz óńirlerdi aralap, kórgen-bilgenimizdi osy azamattarǵa jetkizip otyrsaq, – degen usynys aitty A.Sarym.
Onyń pikirinshe, tamyz aiynyń sońyna deiin naqty sheshimder qabyldap, ary qarai 5-10 adamnan turatyn jumys tobynyń eńbektengeni jón.
Aita ketsek, keshe Prezident Premer-Ministr Kárim Másimovty qabyldap, jer reformasy jónindegi komissiianyń jumys nátijesin usynýdy tapsyrdy. Osy jáne basqa da mańyzdy máseleler tamyzdyń sońynda ótetin Úkimettiń keńeitilgen otyrysynda qaralady.
Búgin H.Dosmuhamedov atyndaǵy Atyraý memlekettik ýniversitetinde QR Premer-ministriniń orynbasary – aýyl sharýashylyǵy ministri Asqar Myrzahmetovtyń tóraǵalyǵymen Jer reformasy jónindegi komissiia músheleriniń Atyraý oblysy halqymen kezdesýi ótip jatyr. Segizinshi otyrysqa komissiianyń 25 múshesi qatysyp otyr.
Kezdesýge aýyl sharýashylyǵy taýaryn óndirýshiler men kásipkerler, salalyq odaqtar men qaýymdastyqtar, barlyq deńgeidegi qoǵamdyq keńes músheleri, partiialyq jáne kásipodaq uiymdary, ortalyq jáne jergilikti atqarýshy organdar qatysyp, óńir aýdandarynyń turǵyndary selektorlyq rejimde bailanysqa shyǵyp otyr. Sonymen qatar, «Bnews.kz» saitynda tikelei efir uiymdastyrylǵan.
Eske sala ketsek, buǵan deiin komissiianyń Astanada tórt, al úsh kóshpeli otyrysy Aqmola, Almaty jáne Qyzylorda oblystarynda ótken bolatyn.
