Qarjylyq monitoring agenttigi «ArselorMittalTemirtaý» AQ-nyń quqyqtyq mirasqory sanalatyn Qarmet kompaniiasynyń múlkin jymqyrý deregi boiynsha tergeý júrgizip jatyr. Kúdikti retinde «AlbaStroiDor» JShS direktory Sergei Kim tanylyp, oǵan kásiporyn ónimin 1,8 mlrd teńgeden astam somaǵa zańsyz shyǵardy degen aiyp taǵylyp otyr, dep habarlaidy Dalanews.kz.
AFM-niń BAQ suraýlaryna bergen jaýabyna sáikes, tergeý metallýrgiialyq zaýyt aýmaǵynan domna qospasy men kesek shoiyndy urlaý faktisi boiynsha júrgizilýde.
Qylmystyq shema qalai júzege asqan?
2015 jyly «ArselorMittalTemirtaý» AQ men «AlbaStroiDor» JShS arasynda domna shlagyn qaita óńdeý týraly kelisimshart jasalǵan. Alaida qujatta qaita óńdeý qaldyqtaryna ielik etý nemese olardy ótkizý quqyǵy qarastyrylmaǵan.
Soǵan qaramastan, tergeý dereginshe, Sergei Kim óndiristik nysandarǵa erkin qoljetimdiligin paidalanyp, zaýyt aýmaǵynan domna qospasy men kesek shoiyndy júieli túrde shyǵaryp otyrǵan.
Urlanǵan ónimdi kedergisiz tasymaldaý úshin qylmystyq shemaǵa «Kýzet 2050» JShS atty affilirlengen kúzet uiymy tartylǵan. Agenttik málimetinshe, kúzet qyzmetkerleri avtokólikterdiń zaýyt aýmaǵynan is júzinde baqylaýsyz ótýine jaǵdai jasaǵan.
Al jymqyrylǵan ónim keiinnen Sergei Kimniń baqylaýyndaǵy «GlobalSpetsTorg» jáne «TsentrOptSnab» JShS arqyly zańdastyrylǵan.
Keltirilgen shyǵyn
Tergeý qorytyndysyna sáikes, zańsyz áreketter saldarynan 31 myń tonnadan astam ónim urlanyp, memleketke keltirilgen jalpy shyǵyn 1,8 mlrd teńgeden asady.
Qazirgi ýaqytta kúdikti Sergei Kim eki ai merzimge qamaýǵa alynǵan. Sotqa deiingi tergeý amaldary jalǵasyp jatyr.
