Aron Atabek: "Ultshylmyz dep júrgen biraz azamat bizdi satyp ketti"
– Saiasatqa qalai keldińiz? Sony aityp ótseńiz?
– 1989 jyldyń tamyz aiynda «Jeruiyq» atty tarihi-etnografiialyq birlestik quryldy. Bul Qazaqstandaǵy eń alǵashqy ulttyq-patriottyq birlestik edi. Biz ony zańdy túrde tirkete aldyq. Men osy birlestiktiń direktory bolyp sailandym jáne ózimniń 50 myń rýblimdi oǵan jarna retinde saldym. Biraz mádeni-ideologiialyq sharýalar da tyndyryp úlgerdik. Jigitter jalaqy alyp júrdi.
Sóitip, qarasha aiy da kelip qaldy.
Sondaǵy bir jinalysta biz mynandai sheshimge keldik:
qazaqta namys bolsa Jeltoqsan oqiǵasynyń 3 jyldyǵyn qalai bolsa da atap ótýimiz kerek! 3 jyl boiyna Qazaqstanda Jeltoqsan oqiǵasy týraly birde-bir adam jumǵan aýzyn ashqan emes edi. Depýtattar da, akademikter de, jazýshylar da, laýreattar da – bári de buǵyp jata qalǵan.
Biz ózimiz, Jeltoqsanǵa qatysýshylar, ustalǵandar, túrmeden sytylyp shyqqanda iz adastyryp, oida-qyrda jan saýǵalap júrgenbiz.
Eki jyldan soń endi Almatyda qaýyshyp, qoi da óler aldynda tuiaǵyn serpidi ǵoi! Shyndyqty álemge jetkizeiik, sóitip sheiit bolǵan Jeltoqsandaǵy joldastarymyzdyń arýaǵyn bir riza qylaiyq dedik. «Qazaqtyń namysyn oiataiyq» dep, qan tógilgen alańda as bereiik dep ýádelestik.
