Aqtóbede perzenthanada jańa týǵan sábidi satý deregine qatysty qylmystyq is qylmys quramynyń bolmaýyna bailanysty toqtatyldy, dep habarlaidy Dalanews.kz.
Atalǵan qylmystyq is 2024 jyldyń 22 qarashasynda qozǵalǵan edi. Bul týraly aqparat 2025 jyldyń qańtarynda BAQ-ta jariialanyp, tergeýmen Aqtóbe oblystyq politsiia departamenti ainalysyp jatqany habarlandy.
"Sotqa deiingi tergeý nátijeleri boiynsha jaýapqa tartylǵandardyń áreketinen QR Qylmystyq kodeksiniń 135-baby 1-bóliginde (Kámeletke tolmaǵandardy satyp alý-satý nemese olardy paidalanýǵa, verbovka jasaýǵa, tasymaldaýǵa, berýge, jasyrýǵa, qabyldaýǵa bailanysty ózge de mámileler jasasý ne osyndai áreketterdi paidalaný maqsatynda jasaý) kózdelgen quqyqbuzýshylyq quramy anyqtalmady. Osyǵan bailanysty qylmystyq is Qylmystyq-protsestik kodekstiń 35-baby 1-bóliginiń 2-tarmaǵyna sáikes toqtatyldy", – dep habarlady QR Ishki ister ministrliginiń baspasóz qyzmeti agenttik saýalyna bergen jaýabynda.
2025 jyldyń qańtarynda BAQ-ta Aqtóbede perzenthanada jańa týǵan náresteni satý faktisi boiynsha qylmystyq is qozǵalǵany týraly aqparat taraǵan edi. Barlyq mán-jai men kúdiktilerdi anyqtaý úshin qajetti tergeý amaldary júrgizildi.
Aita keteiik, byltyr Memleket basshysy "Adam saýdasyna qarsy is-qimyl týraly" Zańǵa qol qoiǵan bolatyn.
