Almatydaǵy ventiliator zaýytynyń direktory, kásipker Marat Baqqulov "Amanat" partiiasynyń óńdeý ónerkásibine arnalǵan korporativtik tabys salyǵyn (KPN) tómendetý bastamasyna qarsy shyqqanyna tańǵalyp otyr, dep jazady Dalanews.kz.
"Shynymdy aitsam, “Amanattyń” bul sheshimine qairan qaldym. Úkimet óńdeý ónerkásibiniń KPN mólsherlemesin tómendetý jóninde durys bastama kótergen edi. Alaida bilik partiiasy oǵan qarsy shyǵyp, "Qazaqstanda kásipkerlerge onsyz da jeńildikter kóp" dep otyr. Qandai jeńildikter týraly aityp otyrǵanyn ózim de, áriptesterim de túsinbei dalmyz”, – deidi kásipker.
Baqqulovtyń aitýynsha, Qazaqstanda ónerkásip oryndaryna eshqandai arnaiy jeńildikter qarastyrylmaǵan.
Máselen, qazir importtalatyn stanoktarǵa qatysty QQS-ty esepke alý múmkindigi bar. Biraq bul tek ónerkásip úshin emes, munai-gaz jáne taý-ken salalaryna da ortaq norma.
“Jańadan zaýyt nemese fabrika salǵan kezde ǵana KPN boiynsha keibir shegerimder bar. Biraq bul óte sirek bolatyn jaǵdai. Onyń ústine, bul jeńildik tek óńdeý ónerkásibine arnalǵan joq. Al kúndelikti ómirde biz kerisinshe, jalaqy qorynan 40 paiyzǵa jýyq salyq pen túrli mindetti aýdarymdardy (zeinetaqy, áleýmettik saqtandyrý, meditsinalyq saqtandyrý) tóleýge májbúrmiz”, – deidi Marat Baqqulov.
Kásipkerdiń pikirinshe, salyq aýyrtpalyǵy tek jumysshylardyń jalaqysymen shektelmeidi. Shikizatqa da kóp shyǵyn ketedi:
“Mysaly, biz bolatty 22 paiyz baj salyǵymen satyp alamyz. Aliýminii men mys sekildi shikizatqa da kemi 10 paiyz kedendik baj salyǵyn tóleimiz. Bul salyqtar tikelei Eýraziia odaǵyndaǵy oligarhtardyń qaltasyna ketedi.
Al eń soraqysy – Qytaidan keletin daiyn ónimderge eshqandai baj salyǵy joq. Bul biz siiaqty otandyq óndirýshilerdi ashyqtan-ashyq kemsitýmen teń”, – dep qynjylady kásipker.
Onyń sózinshe, “Amanat” partiiasynyń QQS mejesin tómendetýge qarsylyǵy da aqylǵa syimaidy. Naqty sektordaǵy iri kásiporyndar biznesti bólshektep, salyqtan jaltara almaidy.
Al qyzmet kórsetý men saýda salasyndaǵy usaq kásipkerler, kerisinshe, óz biznesin bólshektep, salyqtan jaltaryp júr.
“Biz ár jumysshyǵa 40 paiyz artyq shyǵyn jumsap otyrmyz. Sebebi salyq pen túrli tólemdi adal tóleimiz. Al kóleńkede júrgen kásipkerler, kerisinshe, osydan qutylady. Sonda partiia qandai jeńildik týraly aityp otyr?
Kerisinshe, búkil óńdeý ónerkásibine naqty, tiimdi jeńildik berý kerek. Bul – Prezident aityp júrgen JIÓ ósimin qamtamasyz etýdiń jalǵyz joly.
Al arnaiy iriktelgen birneshe kompaniiaǵa ǵana jeńildik jasaýdan paida joq”, – dep qorytyndylady oiyn Marat Baqqulov.
Kásipker biýdjettiń kirisi bólshektenip, kóleńkede qalǵan biznesten, kontrabandadan áldeqaida kóp shyǵyn kórip jatqanyn aitady. Sol sebepti, “naqty óndirýshilerdi qoldaityn kez keldi”, — deidi ol.
