CrimsonLogic Pte Ltd men Almatynyń Sıfrlandyrý basqarmasy birlesken jumys aıasynda megapolısti sıfrlyq transformasıalaýǵa jáne jaıly qalalyq orta qurýǵa basty nazar aýdarýdy josparlap otyr.
Aıta keterligi, yntymaqtastyqtyń alǵashqy jobasy "Almaty qalasynyń biryńǵaı derekter bazasy" boldy. Onyń damý strategıasy álemdegi eń ozyq elderdiń biri – sıngapýrlyq "Citizen 360" modeline sáıkes jáne derekterdi durys basqarý adamnyń múmkindigin arttyrady.
– Biryńǵaı derekter bazasyn iske qosýdaǵy negizgi ıdeıa onyń kómegimen memlekettik organdardyń, komersıalyq jáne akademıalyq uıymdardyń depersonalızasıalanǵan derektermen almasýyn qamtamasyz etý, – dedi Almatynyń Sıfrlandyrý basqarmasynyń basshysy Baıan Qońyrbaev.
Baıan Qonyrbaev Crimsonlogic kompanıasynyń "aqyldy qalalar" jobalaryn iske asyrýda mol tájirıbe jınaqtaǵany, sondaı-aq sıfrlyq transformasıalaý sheshimderiniń portfelin únemi keńeıtip otyratyny týraly aıtty.
– Biz óz aldymyzǵa aıqyn maqsattar qoıamyz – qala turǵyndarynyń ómir súrý sapasyn arttyrý men áleýmettik ahýaldy jaqsartý ǵana emes, jalpy Almatynyń ınovasıalyq tehnologıalaryn damytý. Sıngapýrlyq kompanıamen yntymaqtastyqqa qýanyshtymyz jáne onyń "aqyldy qala" jobalaryn damytý úshin jańa perspektıvalar ashatynyna senimdimiz, – dep tolyqtyrdy Baıan Qońyrbaev.
Óz kezeginde CrimsonLogic Wee tan Yeong vıse-prezıdenti ekijaqty yntymaqtastyqtyń ınovasıalardy engizý prosesin jedeldetetinine jáne Almaty qalasy turǵyndarynyń ómiri men jumysyn jaıly etýge kómektesetinine senim bildirdi.
Sondaı-aq Wee Tan Yeong Sıngapýrda sıfrlyq tehnologıalardy engizý tájirıbesimen bólisti.
– Elimizde sıfrlyq transformasıa 1980 jyldan bastaldy. Osynyń arqasynda JİÓ 100 eseden astam ósti. Sıngapýr barlyq memlekettik qyzmetterdi, sondaı-aq bıznes salasyndaǵy qyzmetterdi ózgertti. Munyń bári meniń kóz aldymda, qara-aq sýretten bastap jarqyraǵan qalaǵa deıin boldy. Osy ýaqyttan bastap sıngapýrlyqtar sıfrlandyrylǵan qyzmetterdi paıdalanýdyń turaqty ádetin qalyptastyrdy, – dedi Wee Tan Yeong.
Sheteldik spıker sıfrlandyrý oıynshylarynyń biri – My Info portalynyń jetistigi týraly aıtty. Onda ekonomıkalyq tranzaksıalar jyldamdatylǵan. Mysaly, bankte ońaı jáne tez shot ashýǵa bolady. Bul aqyldy sheshimniń paıdasyn bankter ǵana emes, sonymen qatar bank bólimshesine barmaı-aq ýaqytyn tıimdi paıdalanýǵa yńǵaıly qarapaıym azamattar da baǵalady.
Crimson Logic-tiń Ortalyq Azıa boıynsha óńirlik dırektory Alýa Satybaldıeva Almatynyń sıfrlandyrý basqarmasy Sıngapýrdyń jolymen júrip jatqanyn aıtty. Ol 30 jyl boıy óziniń tıimdiligin kórsetip kele jatqan túrli platformalar týraly jan-jaqty aıtyp berdi.
– Biz 19 elde jumys isteımiz, bıyl Qazaqstanda ókildik ashamyz. Bizdiń jumysymyzdyń bir baǵyty – sıfrlyq qalalar men sıfrlyq úkimet, – dedi Alýa Satybaldıeva.
Almatyda biryńǵaı derekter qoımasy basqarý júıesin qurýǵa múmkindik beredi.
