Bul reseilik kompaniianyń Orta Aziiadaǵy eń úlken óndiris orny. Zaýyt 225 adamdy jumyspen qamtityn bolady.
Jumysshylardyń 90 paiyzy qazaqstandyqtar.
Zaýyttyń saltanatty ashylý sharasyna Úkimet basshysy Asqar Mamin, Almaty oblysynyń ákimi Amandyq Batalov, Lýkoil kompaniiasynyń tóraǵasy Vagit Alekperov jáne QazMunaiGaz ulttyq kompaniiasynyń basqarma tóraǵasy Alik Aidarbaev qatysty.
"TMD aýmaǵynda bul óz salasy boiynsha eń iri innovatsiialyq jáne jetekshi kásiporyn bolady.
Zaýyt tolyq óndiristik qýatyna kóshkende Qytai, Qyrǵyzstan, Ózbekstan, Túrkimensta, Mońǵoliia, Aýǵanstan naryǵyn mailaý materialdarymen qamtamasyz etetin bolady. Ázir kúni zaýyttyń qurylys jumystary tolyq aiaqtalyp, iske kirisýge ázir. Zaýyttyń qurylysy 2016 jyly bastalǵan. Jobaǵa salynǵan investitsiia kólemi 94 mln dollardy qurady", – dedi Asqar Mamin.
Úkimet basshysynyń aitýynsha óndiris orny el biýdjetine jylyna 10 mln dollar salyq tóleitin bolady.
Óz kezeginde Lýkoil kompaniiasynyń tóraǵasy Vagit Alekperov zaýyttyń 800-den asa mailaý materialdaryn óndiretinin tilge tiek etti.
"Qala men Dala" tilshisiniń "zaýyttyń ornalasý orny bolyp nelikten Almaty oblysy tańlalyp alyndy?" degen saýalyna Lýkoil basshysy:
"Óndiris ornynyń geografiialyq ornalasýy "Lýkoildyń" logistikasyna yńǵaily. "Batys Eýropa - Batys Qytai" dálizi dál janymyzda tur. Osy aradan kúlli Qazaqstan ǵana emes, sonymen birge Orta Aziia elderin mailaý materialdarymen qamtamasyz etemiz. Búgingi zamanǵy kez kelgen tehnika men qurylǵyǵa arnalǵan mai túrleriniń óndirisi jolǵa qoiylady. Protsesterdi avtomattandyrýdyń arqasynda 24 saǵattyń ishinde kez kelgen tapsyrysty qanaǵattandyra alamyz", – dep jaýap berdi.
Al Energetika ministri Qanat Bozymbaev bul joba óńirdiń ǵana emes, tutas memlekettik ekonomikalyq-áleýmettik ahýalyna oń yqpal etedi dep málimdedi.
"Dál qazir kompaniiada qyzmet etetin jumysshylardyń 90 paiyzy qazaqstandyqtar. Bolashaqta kompaniia basshylyǵy otandyq qyzmetkerlerdiń úlesin 95 paiyzǵa deiin arttyratyn bolady. Barlyq eńbek sharttary saqtalǵan, jumysshylardyń ailyq máselesi sheshilgen, qazaqstandyq qyzmetkerlerdiń basym bóligi joǵary sanattar mamandar", – dedi "Qala men Dala" tilshisine pikir bildirgen Energetika ministri Qanat Bozymbaev.
Onyń aityp ótkenindei kompaniia tarapynan ekologiialyq qaýipsizdik máseleleri de qarastyrylǵan.
"Kompaniia óz territoriiasynyń 60 paiyzyn kógaldandyrdy. Zaýyttyń quryl barysynda aýdannyń joǵary seimikalyq qaýpi de eskerildi. Ekologiialyq táýekelder týyndaidy degen qaýip joq", – dedi Bozymbaev.
Aita keteiik, Qazaqstan men «LÝKOIL» kompaniiasyn 23 jyldan bergi seriktestik bailanystyrady. Reseilik kompaniia osy ýaqyt aralyǵynda el ekonomikasyna 7,5 mlrd dollar investitsiia quidy.
Dýman BYQAI
