Almaty oblysynda 31 adamnyń ata-analyq quqyqtaryna shekteý qoiylǵan
Qazirgi kezde iývenaldyq politsiia inspektorlary olardy baqylaýǵa alyp, árqaisysymen jeke aldyn alý jumystary júrgizilýde.
Osy maqsatta 182 mektep inspektory 760 orta bilim berý mekemesimen birlese qyzmet atqarýda. Sondai-aq, 596 «Politsiianyń jas kómekshileri» jasaqtary qurylǵan.
Biylǵy kórsetkish ótken jylmen salystyrǵanda álde qaida tómen eken. Degenmen, sandardy sóiletsek qaýiptiń beti seiilmegenin ańǵarýǵa bolady. Aǵymdaǵy jyly 9 aidyń ishinde kámeletke tolmaǵandarmen jasalynǵan 110 qylmystyq áreketter tirkelgen. Politsiia podpolkovnigi, iývenaldy politsiia bóliminiń bastyǵy Medet Qunanbaevtyń aitýynsha kámeletke tolmaǵandardy beiimdeý ortalyǵyna 66 jasóspirim jetkizilgen. Az kórsetkish emes ekeni anyq. Qaitpek kerek?
Jastar tárbiesi qashanda nysanaǵa alynǵan máseleniń biri. Bul tusta jalpy bilim berý uiymdarynda tárbie jumysy profilaktikalyq is-sharalar negizinde júieli túrde júrgiziletinin atap ótken jón.
Bilim oshaqtarynda «Quqyq buzýshylyqtyń aldyn alý keńesteri», «Qyzdar», «Uldar» uiymdarynyń otyrystary aiyna bir ret ótkizilip, tárbiege qatysty ózekti máseleler talqylanyp otyrady.
Sonymen qatar, iývenaldy politsiia bólimi men bilim berý uiymdary kámeletke tolmaǵandardyń quqyqtaryn qorǵaý komissiialarymen tyǵyz bailanysta qyzmet atqarady.
– Aǵymdaǵy jyly komissiialardyń qaraýyna 279 is-qujat joldandy, onyń ishinde ata-analyq quqyǵynan aiyrý boiynsha – 48, ata-analyq quqyqtaryna shekteý qoiý – 31, jasópirimdermen jasalǵan qylmystar boiynsha – 42, ákimshilik quqyq buzýshylyqtar boiynsha – 127, jasóspirimderdi erekshe rejimdegi bilim berý mekemelerine joldaýǵa – 4 jáne devianttyq minez-qulyqty balalarǵa arnaiy bilim berý uiymyna jasóspirimdi joldaýǵa – 13 is-qujat joldanǵan, – deidi Medet Qunanbaev.
Jasóspirimderge qatysty jasalatyn qylmystardyń aldyn alý maqsatynda Politsiia departamentiniń qalalyq, aýdandyq bólimderimen udaiy negizde reidtik sharalar ótkizilip, quqyq buzýshylarǵa zańda kózdelgen sharalar qabyldanýda.
Bul Atazań aiasynda atqarylǵan jumystardyń bir kórinisi. Túbine boilasaq jastardyń jaǵymsyz iske baryp, shalys basýyna toqtaý salý qoǵam isi. Bir ǵana mekemeniń moinyna ulttyń ulandarynyń keleshegin arta salý enjar elge ǵana tán áreket. Jaýapkerlishik barshaǵa teń. Bir ul ortany, bir qyz ultty tárbieleýshi qural ekenin este saqtaiyq.
Anar SABYROVA, Almaty oblysy.
