RAMS qurylys kompaniiasy Qazaq ulttyq agrarlyq ýniversitetiniń qalashyǵyna toǵyz qabatty bes úi salýdy kózdep otyr. Bul máseleni májilis depýtaty Erlan Sairov kóterdi. Onyń aitýynsha, atalmysh kompaniia stýdentterge tiesili jerdi iemdenip alǵan, dep habarlaidy Dalanews.kz.
Qurylys kompaniiasyna shúilikken májilismen bul daýly máseleni jelidegi paraqshasynda málimdedi.
Videoda depýtat kampýstyń qaq ortasynan qazylǵan shuńqyrdy kórsetip, kópshiliktiń nazaryn aýdarady.
"Dostar, biz qazir Almatydaǵy Ulttyq agrarlyq ýniversitetiniń qalashyǵynda turmyz. "Eski Qazaqstan" ókilderi osy stýdentter qalashyǵynyń ishine álimjettik jasap, toǵyz qabatty bes úi soqpaq. Myna ainalanyń bári - stýdenttik qalashyq. Mine, osy qalashyqtyń ortasyn oiyp, bassyzdyqqa baryp otyr. Meniń oiymsha, stýdentterge mundai álimjettik jasaýǵa bolmaidy. Bizdiń bolashaǵymyz jastar deitin bolsaq, olardyń durys bilim alýyna jáne ǵylymmen ainalysýyna jaǵdai jasaýymyz kerek. Mundai jaǵdaiǵa tosqaýyl qoiýymyz qajet", - dedi Cairov.
Osy tusta májilismen atalmysh máseleni Bas prokýratýramen birlesip sheshetinin aityp, ýádesin berdi.
"Almatydaǵy RAMS kompaniiasy balalarymyzdyń jerin qaitarmai otyr. Meniń oiymsha, bul máselemen bas prokýratýra ainalysýy kerek. Jerdi stýdentterge qaitaryp berýimiz kerek. Bul máseleni bas prokýratýramen birigip, qolǵa alatyn bolamyz", - dep sózin qorytyndylady depýtat.
Eske salaiyq, Sairov buǵan deiin de 2023 jyldyń jazynda Qazaq ulttyq agrarlyq zertteý ýniversitetiniń aktivterin qaitarýdy talap etken bolatyn. Májilismen bas prokýror Berik Asylovqa joldaǵan depýtattyq saýalynda, Qazaq ulttyq agrarlyq zertteý ýniversitetiniń bir top oqytýshy ǵalymy májilis depýtattaryna ýniversitetten zańsyz shyqqan aktivterdi oqý ornyna qaitarý týraly ótinish jasaǵanyn jetkizgen.
"2001-2022 jyldary myń oryndyq stýdenttik úsh jataqhana, bes oqý-zertteý korpýsy - 18,828 sharshy metr. Ákimshilik sharýashylyq ǵimarattar jáne ózge de jyljymaityn múlik obektileri - 700 sharshy metr, ýniversitet ǵimarattaryna irgeles jer ýchaskeleri - 5 gektar jer. Almaty oblysynyń Talǵar jáne Eńbekshiqazaq aýdanynda ornalasqan ýniversitettiń oqý tájiribelik sharýashylyq jer ýchaskeleri - 12 gektar. Barlyǵy qoldy bolyp ketken", - dedi Erlan Sairov.
Sonymen qatar depýtat tekserý qorytyndysy boiynsha tiisti organdarmen birlesip, múlikti qaitarý jóninde jumys jasalatynyn da aitqan bolatyn.
"Túieni túgimen jutatyndardyń" zamany ótti, olardyń atyn atap, túrin tústep shyndyqty halyqtyń aldyna shyǵarý kerek”, – dep málimdeme jasaǵan edi.
Al istiń mán-jaiyn anyqtaý úshin Dalanews.kz agenttigi Qazaq ulttyq agrarlyq zertteý ýniversitetine saýal joldady.
