Sonymen bizde komissiia quryldy, oǵan ártúrli salanyń mamandary kirdi. Demek, ol birjaqty emes. Onyń ústine bul komissiia Jer týraly kodeksti resmi ári zań júzinde ózgerte alatyn birden-bir mehanizm. Ázir biz dál osy ispen ainalysyp jatyrmyz. Dál qazir biz asyǵystyq tanytyp otyrǵan joqpyz, sebebi, biz qarsy shyqqan zań normalary toqtatylǵan, dál ázir olar óz kúshinde emes. Bylaisha aitqanda, máselege baisaldy túrde baǵa beretin ahýal qalyptasty. Osy sebepti de men adamdardy 21 mamyrda alańǵa shyǵýǵa úndegen joqpyn
Alaida halyq báribir de alańǵa shyqty. Adamdar alańǵa shyqty eken, endeshe bilik olardy tyńdaýy tiis, sebebi olar osy eldiń azamattary. Olar alańǵa shyqsa erikkennen shyqqan joq, olardy áldebir dúnie qatty alańdatty degen sóz. Dál osy másele olardyń alańǵa shyǵýyna túrtki boldy.
Shyqsyn, shyqpasyn bular bizdiń eldiń azamattary. Olar bóten elden bolmasa basqa bir álemnen kelgen joq. Bilik olardy dóńgelek ústeldiń basyna shaqyryp aqyldasýy nemese halyqpen birge alańǵa shyǵyp, qarapaiym halyqtyń oi-pikirin tyńdaýy qajet edi. 24 sáýirde halyq kóshege shyqqanda Atyraýdyń ákimi sóitken bolatyn. Almatyda qanshama záýlim sarai qańyrap bos tur. Halyqtyń pikirin tyńdaý úshin Respýblika saraiynyń ózi artyǵymen jetedi. Halyq degenimiz salyqtóleýshiler, saiyp kelgende bilik, politsiianyń ózi halyqtyń arqasynda kún kórip otyr.
21 mamyrda alańǵa shyqqan adamdardyń artynan qýý, quryqtaý, avtobýsqa laqtyrý bilik ózi tańdaǵan eń soraqy stsenarii. Biz de osy eldiń azamattary emespiz be?! Eger adam qoǵamdyq tártipti buzbasa, ekstremistik urandardy aiǵailamasa ony ustaýdyń ne qajeti bar? HHI ǵasyrdyń órkenietti memleketi bulai jasamasa kerek edi...
Derekkóz: tengrinews.kz
Aýdarǵan, Dýman BYQAI
