Sarapshylardyń dereginshe Qazaqstandaǵy elektr qýatynyń 70 paiyzy kómir elektr stantsiialarynan alynady.
Dalanews-ke pikir bildirgen Energetika ministrligine qarasty Qaita qalpyna keletin energiia kózderin endirý jáne monitoringileý basqarmasynyń basshysy Dáýlet Zákáriianovtyń aitýynsha muhittan qashyq ornalasqanyna qaramai, Qazaqstan ekologiialyq taza energiia kózderine bet burǵan.
«Osydan 13 jyl buryn qaita qalpyna keletin energiia kózderine qatysty asa mańyzdy zań qabyldandy. Sonyń arqasynda salaǵa investor tartýdyń múmkindigi týdy. 2025 jylǵa deiin Qazaqstandaǵy qaita qalpyna keletin energiia kózderiniń úlesin 6 paiyzǵa jetkizýdi kózdep otyrmyz.
Al 2030 jylǵa qarai bul kórsetkishti 30 paiyzǵa jetkizý josparda bar. 2050 deiin osy kórsetkishti 50 paiyzǵa deiin kóterip, jer qoinaýynan alynatyn janar-jaǵarmai men jasyl energiia arasynda energetikalyq tepe-teńdilik ornatqymyz keledi», – deidi ministrlik ókili.
Zákáriianovtyń atap ótkenindei osy ýaqyt aralyǵynda qýaty 1400 MVt-ny quraityn jasyl energiia kózderiniń negizinde jumys isteitin 59 jobanyń tusaýy kesiledi.
Energetika ministrliginiń málim etkenindei Aziia damý banki men Eýropalyq qaita qurý jáne damý banki atalǵan salaǵa investitsiia quiýǵa ázir. Naqtylap aitqanda, atalǵan qarjy institýttary kún energiiasynan qýat alatyn eki birdei jobaǵa investitsiia quiýǵa oqtalyp otyr.
Bul óz kezeginde energiiadan tapshylyq kórip otyrǵan Qazaqstannyń ońtústigin qajetti qýat kózimen qamtamasyz etpek.
Dalanews osynaý jobalarǵa qatysty qyzyqty málimetke qol jetkizdi.
Elimizdiń ońtústik-shyǵysynda ornalasatyn M-KAT kún elektr stantsiiasynyń qýaty 100 MVt-ny quraityn bolady, stantsiianyń aýmaǵy 300 gektardy jerdi alyp jatyr.
Aita ketelik, bul Aziia damý bankiniń kún energetikasy salasyndaǵy Orta Aziia aýmaǵynda buryn sońdy bolmaǵan erekshe jobasy. Stantsiia tolyqqandy iske qosylǵannan keiin orta eseppen 177 gigavatt-saǵatty quraityn energiia óndiredi dep kútilýde.
Qazaqstan territoriiasynda salynatyn stantsiianyń ereksheligi kún qozǵalysyn baqylap otyratyn, osynyń nátijesinde elektr qýatyn 25 paiyzǵa artyq óndiretin áleýeti bar.
Aziia damý banki investitsiia baǵyttaityn taǵy bir joba: qýaty 50 MVt-ny quraityn Baiqońyr kún elektr stantsiiasy. Elimizdiń ońtústik óńirinde ornalasatyn stantsiianyń kómegimen aýaǵa tastalatyn ziiandy qaldyqtardy jylyna 40 myń tonnaǵa deiin azaitýǵa bolady.
M-KAT tilshisi bul oraida «Baiqońyr Solardyń» kompaniiasynyń basshysy Evgenii Gladievke habarlasyp, mańyzdy aqparat alǵan bolatyn.
«Stantsiia Qyzylorda oblysynda ornalasqan. Ózderińiz biletin bolarsyz, Syr óńiri qýat kózderiniń 55 paiyzyn ózge óńirlerden tasymaldaidy. Jańa stantsiia iske qosylǵan jaǵdaida táýeldilikten birshama arylýǵa bolady, budan bólek 40 jańa jumys orny ashylady, jumysqa jergilikti turǵyndardy ǵana alamyz», – deidi ol.
«Qazaqstan ekologiiany taza ustaýǵa kelisken Parij kelisim oryndaýǵa múddeli. Jasyl energiia kózderiniń úlesin arttyrý arqyly aldaǵy 15-20 jylda energetikalyq sektordyń sipatyn ózgertemiz, onda qaita qalpyna keletin qýat kózderiniń úlesi artady», – deidi óz kezeginde sarapshylar.
Jasyl tehnologiialardyń qyr-syryn biletin mamandardyń aitýynsha Qazaqstan territoriiasy kún energiiasymen bailanysty jobalardy júzege asyrýǵa qolaily aimaq.
Al Dáýlet Zákáriianovtyń atap ótkenindei atalǵan salaǵa investorlardyń qyzyǵýshylyǵy artqan saiyn jańa jumys oryndary ashylady. Eń bastysy bizdi el 2050 jyly jasyl ekonomikaǵa kóshý týraly maqsatyna qol jetkizedi.
