Qyzylorda oblysynda óz esepshotyn úshinshi tulǵalarǵa bergen 5 azamat qylmystyq jaýaptylyqqa tartyldy, dep habarlaidy Dala News.
Olardyń biri jeńil tabys tabý maqsatynda bank esepshotyn 20 myń teńgege bógde adamdarǵa paidalanýǵa berip, droperlikpen ainalysqan. Sot úkimimen ol Qylmystyq kodekstiń 232-1-baby 1-bóligi boiynsha kináli dep tanylyp, 20 AEK mólsherinde aiyppul aldy.
Prokýratýra málimetinshe, droperler alaiaqtyq shemalarda deldal retinde áreket etedi — zańsyz aqsha qabyldap, ony basqa shottarǵa aýdaryp nemese qolma-qol sheship beredi.
Zań boiynsha mundai áreket úshin aiyppuldan bastap 7 jylǵa deiin bas bostandyǵynan aiyrý jazasy qarastyrylǵan.
Sonymen qatar, eger azamat zańsyz shemaǵa qatysqanyn óz erkimen habarlap, tergeýge kómektesse, qylmystyq jaýapkershilikten bosatylýy múmkin.
Prokýratýra turǵyndardy óz bank derekterin bógde adamdarǵa bermeýge shaqyrdy.
