Májilis depýtaty Aidarbek Qojanazarov Shymkent qalasy ákiminiń orynbasary Rýslan Berdenovke oq atqan azamattyń qylmysqa deiingi jaǵdaiyn sipattap, onyń birneshe kún boiy ishimdik ishkenin alǵa tartty, dep habarlaidy Dalanews.kz.
“Naqty sol jerde mas bolǵanyn dóp basyp aita almaimyn. Biraq estýimshe, birneshe kún araq ishken”, – deidi depýtat.
Eske sala keteiik, 21 sáýirde Shymkent qalasy ákimdigi ǵimaraty mańynda atys boldy. Saldarynan Rýslan Berdenov jaraqat aldy. Politsiia málimetinshe, kúdikti ustalyp, ýaqytsha ustaý izoliatoryna qamalǵan, bul derek boiynsha qylmystyq is qozǵalǵan.
Al Densaýlyq saqtaý ministrligi málimetinshe, Rýslan Berdenovke operatsiia jasalǵan, ómirine qaýip joq.
"Shymkent qalasy ákiminiń orynbasary oq jaraqatymen qalalyq aýrýhanaǵa tústi. Oǵan shuǵyl operatsiia jasaldy. Operatsiia barysynda qan ketý toqtatyldy, zaqym qalpyna keltirildi. Ómirine qaýip joq", - dep jazylǵan habarlamada.
Málimetke súiensek, onyń jaǵdaiy turaqty aýyr dep baǵalanady. Sheneýnik dárigerlerdiń turaqty baqylaýynda jáne qajet meditsinalyq kómekti alyp jatyr.
