Eldegi jappai tártipsizdikter kezinde kóptegen adamnyń qaitys bolýyna bailanysty QR Prezidenti Qasym-Jomart Toqaev 10 qańtardy Jalpyulttyq aza tutý kúni dep jariialady.
Búgin Qazaqstan boiynsha Memlekettik týlardyń barlyǵy tómen túsiriledi. Osylaisha búlik kezinde qaza tapqan beibit turǵyndar men áskeriler, politsiia ókilderi men quqyq qorǵaý qyzmetkerlerine qurmet kórsetiledi.
Keiingi kúnderi bolǵan qaqtyǵystar kezinde qaitys bolǵan azamattardyń týǵan-týysqandary men otbasylaryna Memleket basshysy Qasym-Jomart Toqaev kóńil aitqan bolatyn.
– Almatyda sodyr-lańkesterdiń qolynan ákimshilik ǵimarattar ǵana emes, beibit turǵyndardyń múlkine de zalal keldi. Sondai-aq júzdegen beibit turǵyn men áskeri qyzmetshiniń densaýlyǵy men ómirine qater tóndi. Osy tragediialar kezinde qaitys bolǵandardyń otbasyna kóńil aitamyn, – dedi Prezident.
Sondai-aq Memleket basshysy qaskóilikke barǵan adamdardyń bári qatań jazalanatyny aitty.
– Bizdiń tarihymyzdaǵy osy bir qiyndyqty tez arada eńseretinimizge eshqandai kúmán joq. Eń bastysy, bolashaqta mundai oqiǵalardyń qaitalanýyna jol bermeý kerek. Men qurǵan vedomstvoaralyq top sodyrlar men lańkesterdi izdeýmen jáne olardy ustaýmen ainalysady. Olardyń bári qatań qylmystyq jaýapkershilikke tartylady dep azamattarymyzǵa ýáde beremin. Barsha qazaqstandyqtan ótinerim, saqtyq tanytyp, barynsha qyraǵy bolyńyzdar. Kúmándi adamdardyń qandai da bir kúdik týdyratyn belsendi áreketin baiqasańyz, quqyq qorǵaý organdary men jedel jelilerge habarlańyzdar, – dedi Q.Toqaev. Eske salsaq, Mańǵystaý oblysynyń Jańaózen qalasynda bastalǵan beibit sherýge Qazaqstannyń ózge óńirleri de qosylyp, onyń arty sodyrlardyń ylańyna ulasqan bolatyn. Jaǵdai ýshyqqandyqtan 5 qańtar kúni Prezident Qasym-Jomart Toqaev Almaty qalasy men Mańǵystaý oblysynda tótenshe jaǵdai rejimin engizý týraly Jarlyqqa qol qoidy. Keiin Qazaqstannyń búkil aýmaǵy boiynsha tótenshe jaǵdai rejimi engizildi. 7 qańtar kúni QR Prezidentiniń kelisimimen QR Ulttyq qaýipsizdik komitetiniń tóraǵasy – Respýblikalyq jedel shtab basshysynyń buiryǵyna sáikes Qazaqstan Respýblikasynyń aýmaǵynda terroristik qaýiptiń shekti «qyzyl» deńgeii jariialandy. QR Ishki ister ministrliginiń sońǵy deregi boiynsha Almatydaǵy oqiǵalarǵa bailanysty sotqa deiingi 125 tergeý bastalǵan. Bul ister kisi óltirý, bilik ókiline zorlyq-zombylyq jasaý, qarýly shabýyl, buzaqylyq jáne urlyq faktileri boiynsha qozǵalǵan. QR Ishki ister ministrligi búlikshilermen qaqtyǵysta qaza tapqan politseilerdiń tizimin jariialady. Óz mindetin adal atqarǵandar: Tarazdyq politsiia qyzmetkeri kapitan Slanbekov Rahat Nurbaiuly; Almaty qalasynyń politsiia starshinasy Qambetov Rinat Talǵatuly; Almaty politsiia bóliminiń aǵa serjanty Asylhanov Álen Muhituly; Praporshik Erjanov Erbol Tileýbekuly; Jambyl oblystyq politsiiasynyń kishi serjanty Almasov Nurbolsyn Ǵaniuly. QR Ulttyq qaýipsizdik komiteti de qyzmettik boryshyn atqarý kezinde qaza tapqan qyzmetkerlerdiń tizimin jariialady. «QR Ulttyq qaýipsizdik komiteti qańtar aiyndaǵy oqiǵalar saldarynan qyzmettik boryshyn atqarý kezinde qaza tapqan ulttyq qaýipsizdik organdary qyzmetkerleriniń otbasylaryna, týǵan-týysqandary men jaqyndaryna qaiǵyryp, kóńil aitady, – delingen komitet habarlamasynda.
Qaza tapqan qyzmetkerlerdiń tizimi:
- QR UQK Shekara akademiiasynyń kafedra bastyǵy Andrei Kabdinov;
- Jambyl oblysy boiynsha Ulttyq qaýipsizdik komiteti departamenti Terrorizmge qarsy ortalyq bóliminiń bastyǵy Dastan Ádilbai;
- QR UQK Shekara akademiiasynyń aǵa ofitseri Jandos Jaǵalbaev;
- ÁQBB kishi jedel ýákili Ádil Núrkenov;
- QR UQK Shekara akademiiasynyń kýrsanty Jaiyq Ádilqan;
- QR UQK Shekara akademiiasynyń kýrsanty Meiirhan Bitim;
- QR UQK Shekara akademiiasynyń kýrsanty Dáýlet Juparbekov.
QR Ishki ister ministrliginiń sońǵy deregi boiynsha Almatydaǵy oqiǵalarǵa bailanysty 125 sotqa deiingi tergeý bastalǵan. «Bilik ókilderine qatysty kúsh qoldaný, buzaqylyq, kisi óltirý, sondai-aq qaraqshylyq shabýyldar men urlyqtyń barlyq faktileri boiynsha sotqa 125 deiingi tergeý bastaldy. 5 myńnan astam adam ustaldy», - dedi ministrdiń mindetin atqarýshy Erlan Turǵymbaev.
