2026 jyly 1 qyrkúiekten bastap Almatyda benzinmen, gazben jáne dizel otynymen júretin avtokólikter ekologiialyq normativterge sáikestigin anyqtaý úshin tehnikalyq tekserýden ótýge tiis. Bul týraly A-parking mamandary málimdedi, dep habarlaidy dalanews.kz.
Bul tehnikalyq tekserý mindetti tehnikalyq baiqaýdyń quramdas bóligi emes, jeke rásim bolyp sanalady. Onyń barysynda shyǵaryndylar deńgeii ólshenedi: benzinmen jáne gazben júretin avtokólikterdiń paidalanylǵan gazdyń ýyttylyǵy, al dizeldi kólikterdiń tútin shyǵarý deńgeii tekseriledi. Tekserý QR ST 1433-2023 ulttyq standartyna sáikes júrgiziledi. Tehnikalyq tekserýden merziminen buryn ótýdiń qajeti joq. Jańa talap kezekti mindetti tehnikalyq baiqaý merzimi 1 qyrkúiekten keiin keletin avtokólikterge ǵana qoldanylady.
Eger avtokólik 2026 jyly 1 qyrkúiekke deiin tehnikalyq baiqaýdan ótse, berilgen qujat belgilengen merzimi aiaqtalǵanǵa deiin jaramdy bolady. Tehnikalyq baiqaýdan qaita ótýdiń nemese osy merzimge deiin ekologiialyq tekserýden ótýdiń qajeti joq.
Mindetti tehnikalyq baiqaýdan burynǵydai kez kelgen qoldanystaǵy tehnikalyq baiqaý ortalyǵynda ótýge bolady. Al shyǵaryndylar deńgeiin ólsheýge arnalǵan tehnikalyq tekserý qajetti jabdyqpen qamtylǵan akkredittelgen stantsiialarda ǵana júrgiziledi.
Bul rette avtokólik iesi qalaýy boiynsha akkredittelgen stantsiiada eki rásimnen de – tehnikalyq tekserý men mindetti tehnikalyq baiqaýdan birden óte alady. Akkredittelgen stantsiialardyń tizimi almaty-parking.kz saitynda qosymsha jariialanady.
