Үш күндік шараның ашылу салтанаты Бикен Римова атындағы драма театрында өтті. Алматы облысы әкімінің орынбасары Ләззат Тұрлашов жиналғандарды тарихи тағылымы терең шараның басталуымен құттықтап, жобаның маңыздылығына тоқталды.
– Бұл – еліміздің рухани, мәдени өмірінде ешқашан болмаған, тұңғыш әрі теңдессіз оқиға. Жер жүзі Қазақстан қандай ел екенін, қазақ қандай ұлт екенін, негізінен, осы жоба арқылы танитын болады, – деді Л.Тұрлашов.
Конференцияға халықаралық спикерлер ретінде Сорбонна университетінің профессоры, Халықаралық ғылым және өнер институтының директоры, «Plastik Art & Science» Сорбонна баспа бағдарламасының директоры Ольга Кисселева, актер, Халықаралық «HIGHFEST» өнер фестивалінің президенті, Метрополитан Лондон университетінің профессоры, доктор Артур Гукасян Қазақстан мен Қырғызстандағы мәдениет және ынтымақтастық мәселелері бойынша Франция Елшілігінің кеңесшісі Гийом Касперский, Белорусь мемлекеттік мәдениет және өнер университетінің психология және педагогика кафедрасының меңгерушісі, педагогика ғылымдарының докторы, Германиядағы МАГО білім беруді ізгілендіру халықаралық академиясының толық мүшесі Ирина Малахова, драматург, театр сыншысы, «Thaetr - Dialogue» фестивалінің арт-директоры, «Nova Scena» кластерінің негізін қалаушы Томаш Киренчук арнайы шақырылды.
Конференцияның пленарлық отырысының модераторы – танымал тележүргізуші, журналист Айгүл Мүкей.
Қазақстандық мәдениеттің жетістіктерін, салт-дәстүрін әлемге паш ету мақсатында қонақтарға қазақтың ұлттық бұйымдары мен тағамдары кеңінен таныстырылды. Ерекше қызығушылық білдірген қатысушылар ұлттық киімдерімізді киіп, естелік суретке де түсті.
– Қазақстанға Франция елінің мәдениетін таныстыру, тәжірибие алмасу мақсатында келдік. Қазақстандық мәдениетті әлемдік аренада таныту, оның өз елімізде жақсы көзқарас қалыптасуына ықпал етеміз. «Рухани жаңғыру» бағдарламасын іске асыру – ХХІ ғасырда еліміздің бәсекеге қабілеттілігін арттыратын кешенді әрі қызғылықты жұмыс, – деді Франция Елшілігінің кеңесшісі Гийом Касперский.
Балжан ЖҰМАНБЕКОВА
