Қостанайда құжат бойынша «қайтыс болды» деп тіркелген 56 жастағы тұрғын қателік түзетілгеннен кейін қайтадан «тірі» деп танылды, деп хабарлайды Dala News.

Оқиға Тобол Инфо мәліметінше, Владимир Шремф анасының қайтыс болғаны туралы анықтаманы Әулиекөл аудандық ауруханасы жанындағы емханаға тапсырған. Анасы 30 наурызда көз жұмған.

Алайда емхана қызметкері деректерді базаға енгізу кезінде марқұмның орнына Владимир Шремфтің өзін «қайтыс болды» деп тіркеген.

Ер адам бұл қателік туралы тек 2 сәуірде, электронды қолтаңба мен ЖСН бойынша мәселелер туындағанда білген. Осыдан кейін бірден емханаға хабарлағанымен, медициналық мекеме тиісті ақпаратты облыстық денсаулық сақтау басқармасына тек 6 сәуірде жолдаған.

Осы уақыт ішінде ер адам жұмыс істей алмаған, көлік жүргізе алмаған және құжаттарын пайдалана алмаған, себебі олар жарамсыз болып қалған.

Кейін ол адвокат Дильмурат Сарсенов арқылы тіркеуші орган мен АХАТ-қа шағым түсірген. Қате жазбаны жою талап етілген.

Нәтижесінде 9 күннен кейін жүйеде оның мәртебесі түзетіліп, «тірі» деп қайта енгізілген. Құжаттарды қайта рәсімдеу қажет болмаған.

Адвокаттың айтуынша, енді жәбірленуші медициналық мекемеге моральдық шығынды өтеу туралы талап қоюды жоспарлап отыр.