Geely Galaxy EX5 EM-i шілде айында Қазақстандағы ең көп сатылған гибридті көлік атанды, деп хабарлайды dalanews.kz.
2026 жылғы шілдеде Қазақстанда осы модельдің 255 данасы сатылған. Бұл маусым айындағы көрсеткіштен шамамен 60%-ға жоғары.
Жыл басынан бері Geely Galaxy EX5 EM-i көлігінің сатылымы 910 бірлікке жетті. Сұраныстың өсуі қазақстандықтардың гибридті күштік қондырғылары бар автомобильдерге қызығушылығының артып келе жатқанын көрсетеді. Мұндай көліктер қала ішінде үнемді жүруге және алыс сапарларда жүріс қорын ұзақ сақтауға мүмкіндік береді.
Geely Galaxy 2025 жылы қазақстандық Allur автомобиль компаниясының портфеліне қосылды. Ал EX5 EM-i моделін шығару Қостанайдағы зауытта жолға қойылған. Бұл модель Қазақстанда өндірісі басталған алғашқы жеңіл гибридті автомобиль атанды.
Geely Galaxy EX5 EM-i толық жанармай багы мен қуатталған аккумулятормен 1003 шақырымға дейін жүре алады. Оның ішінде 100 шақырымға дейінгі қашықтықты тек электр қуатымен жүріп өтуге мүмкіндік бар.
Аралас циклдегі отынның өлшенген шығыны шамамен 2,4 литрді 100 шақырымға құрайды. Ал аккумуляторды тұрақты түрде қуаттамай пайдаланған жағдайда бұл көрсеткіш шамамен 6–6,3 литрге жетеді.
Электр қозғалтқышының қуаты 218 ат күшін құрайды. Автомобиль қауіпсіздік жүйелерімен, жүргізушіге көмектесетін электронды ассистенттермен және цифрлық функциялармен жабдықталған.
Компания өкілдерінің айтуынша, Geely Galaxy-ге қызығушылықтың артуына көліктің технологиялық мүмкіндіктерімен қатар, сатып алуға ұсынылатын қолайлы жағдайлар да әсер етіп отыр.
«Geely Galaxy-ге қызығушылықтың артуы автомобильдердің технологиялық мүмкіндіктерімен ғана емес, сонымен қатар сатып алудың қолжетімді шарттарымен де байланысты. Клиенттерге арнайы бағалар, бастапқы жарнасыз несие бағдарламалары және Trade-in бағдарламасы арқылы сатып алу мүмкіндігі ұсынылады. Geely Galaxy EX5 EM-i көлігінің арнайы ұсыныс бойынша бағасы 12 099 000 теңгеден басталады», – деп хабарлады компания.
Шілдедегі нәтиже модельге гибридтер сегментінде бірінші орын алуға мүмкіндік берді. Сонымен қатар бұл көрсеткіш Қазақстанда өндірілетін баламалы күштік қондырғылары бар автомобильдердің нарықтағы позициясын да нығайтты.
