2027 жылдан бастап Қазақстанда ипотекалық несие бойынша ең жоғары сыйақы мөлшерлемесі бастапқы жарна көлеміне байланысты белгіленеді, деп хабарлайды dalanews.kz.
Жаңа ережеге сәйкес, пәтер сатып алушы тұрғын үй құнының кемінде 30 пайызын бастапқы жарна ретінде төлесе, ипотеканың ең жоғары мөлшерлемесі 20 пайыздан аспайды.
Мысалы, құны 30 миллион теңге болатын пәтерді сатып алу кезінде қазақстандық 9 миллион теңге (30%) немесе одан көп бастапқы жарна төлесе, банк несие бойынша 20 пайыздан жоғары мөлшерлеме белгілей алмайды.
Ал егер сатып алушы 6 миллион теңге (20%) ғана бастапқы жарна енгізсе, онда ипотеканың шекті мөлшерлемесі 25 пайызға дейін жетуі мүмкін.
Осылайша, жаңа тәртіп бойынша бастапқы жарна неғұрлым көп болса, ипотека бойынша қолданылатын ең жоғары пайыздық мөлшерлеме соғұрлым төмен болады.
