Келесі LRT бағыты Қосшыға қарай өтеді. Бұл туралы Астана әкімі Жеңіс Қасымбек мәлімдеді, деп хабарлайды Dalanews.kz.
Қала басшысының айтуынша, күн сайын Қосшыдан Астанаға 15-тен 20 мыңға дейін көлік кіріп тұрады, бұл қалалық жолдарға айтарлықтай жүктеме түсіреді.
«Қосшы өсіп келеді, ол – Астанаға көп көмегін тигізіп отырған ірі серіктес қала. Сол арқылы жүктеме азайып жатыр. Сондықтан Қосшыдан қалаға қарай қозғалыс белсенді, және біз келесі кезеңді осы бағытта салатын боламыз», – деп атап өтті әкім.
Қасымбектің айтуынша, бұл – жобаның екінші кезеңіндегі тармақтардың бірі ғана. Екінші тармақ Сығанақ көшесі арқылы Тұранға дейін, әрі қарай қаланың ескі бөлігіне – ескі теміржол вокзалына дейін өтеді. Қосшы бағытына баратын алғашқы бөлігі бір жарым жылдың ішінде аяқталады деп жоспарланып отыр.
Қаржыландыруға келсек, әкімнің айтуынша, қаражат қарыз түрінде алынуы мүмкін.
Сондай-ақ, қала басшысы Қосшы бағытына тартылатын желінің бір бөлігі жер үстімен өтетінін атап өтті.
— «Бүгінде таң сайын, әсіресе сағат 08:00 шамасында, Қосшыдан қалаға 50 мыңнан астам адам келеді. Бұл Тұран, Қабанбай батыр және Мәңгілік Ел көшелеріне зор жүктеме түсіреді», – деді ол.
