Әлеуметтік желілерде Алматы қаласының «Каспий» тұрғын үй кешенінде бір топ ер азамат күзетшіге және тұрғындардың біріне шабуыл жасағаны жөнінде ақпарат пайда болды. Оқиғаға қатысты видео Instagram-да жарияланған. Оқиғаны қала полициясының баспасөз қызметі түсіндірді, деп хабарлайды Dalanews.kz.
Instagram пабликтерінде жазылғандай, төбелес 5 қараша күні болған. Болжам бойынша, оған 12 адам қатысқан.
«Бұзақылық фактісі бойынша Алатау аудандық полиция басқармасы қылмыстық іс қозғады. Оқиғаға қатысқан алты адамның барлығы анықталып, ұсталып, уақытша ұстау изоляторына қамалды», – деп хабарлады полиция өкілдері.
Тергеу жүргізіліп жатқаны нақтыланды. Сондай-ақ, полиция қала тұрғындарын кикілжіңдерді заңды жолмен шешуге және қоғамдық тәртіпті бұзбауға шақырды.
