1 шілдеден бастап Қазақстанда маңызды өзгерістер күшіне енеді. Олар мемлекеттік басқару жүйесінен бастап құрылыс, цифрлық төлемдер мен заңнамаға дейінгі бірнеше саланы қамтиды. Dalanews.kz редакциясы солардың бірқатарына шолу жасады.
Жаңа Конституция күшіне енеді
1 шілдеден бастап Қазақстанда республикалық референдумда қабылданған жаңа Конституция ресми түрде қолданысқа енгізіледі. Осы күннен бастап 1995 жылғы Конституцияның күші тоқтайды.
Жаңа Негізгі заң елдің саяси жүйесін жаңғыртуға бағытталған. Конституцияның күшіне енуімен бірге мемлекеттік органдардың жұмысы жаңа талаптарға сәйкестендіріледі. Парламенттің қазіргі құрамы өз жұмысын аяқтап, жаңа тәртіпке сәйкес саяси институттарды қалыптастыру кезеңі жүреді.
Бірыңғай QR төлем жүйесі іске қосылады
Ұлттық банк пен екінші деңгейлі банктер кезең-кезеңімен бірыңғай QR жүйесін енгізеді.
Бұл жаңашылдықтың арқасында сатып алушы қай банктің мобильді қосымшасын пайдаланса да, кез келген дүкендегі бір ғана QR-код арқылы төлем жасай алады. Яғни әр банкке жеке QR қою қажеттілігі жойылады.
Құрылыс саласында жаңа талаптар енгізіледі
Шілде айынан бастап құрылыс саласында жаңартылған құрылыс нормалары мен техникалық талаптар қолданыла бастайды.
Жаңа ережелер ғимараттардың қауіпсіздігін арттыруға, жобалау сапасын жақсартуға, энергия тиімділігін күшейтуге және халықаралық стандарттарға жақындауға бағытталған. Сонымен қатар құрылысқа қойылатын бақылау талаптары да күшейеді.
Мемлекеттік қызметтердің бір бөлігі жаңарады
Цифрландыру аясында бірқатар мемлекеттік қызмет көрсету тәртібі өзгертіледі. Кейбір қызметтер толық электронды форматқа көшіріліп, құжаттарды рәсімдеу процесі жеңілдейді. Бұл азаматтардың уақытын үнемдеп, мемлекеттік қызметтердің қолжетімділігін арттыруды көздейді.
Бизнес үшін бірқатар жаңа талап күшіне енеді
1 шілдеден бастап заңды тұлғалар туралы мәліметтерді жаңарту және мемлекеттік деректер базасын жүргізуге қатысты өзгерістер күшіне енеді. Бұл өзгерістер компаниялар туралы ақпараттың өзектілігін қамтамасыз етуге бағытталған.
