سالتاناتتى اشىلۋ شاراسىنا تۇركيا، ءازىربايجان، وزبەكستان، تاتارستان جانە قىرعىزستان رەسپۋبليكالارىنان شاقىرتۋ العان اقپارات قۇرالدارىنىڭ جەتەكشىلەرى مەن وكىلدەرى قاتىستى.
تۇركىستان وبلىسىنىڭ اكىمى جانسەيىت تۇيمەبايەۆ جاڭا ورتالىقتاردىڭ جۇمىسىنا ساتتىلىك تىلەپ، بۇل قادام تۇركىستاننىڭ تۇركى الەمىنىڭ رۋحاني ءارى اقپاراتتىق ورتالىعىنا اينالۋىنا سەرپىن بەرەتىنىن جەتكىزدى.
مەديا ورتالىقتا بريفينگ جانە شاعىن كەڭەستەر وتكىزەتىن ورىندار بار. جۇمىس ىستەۋگە قاجەتتى جاڭا جيھازدارمەن، كومپيۋتەرلەرمەن جانە عالامتور جەلىسىمەن تولىقتاي قامتىلعان.
مۇندا تۇركىستان وبلىسىنىڭ وڭىرلىك كوممۋنيكاسيالار قىزمەتى، تۇركىستانداعى ق.ا.ياساۋي اتىنداعى حقتۋ-دىڭ ستۋدەنتتەرىنەن قۇرالعان ەرىكتى جاس جۋرناليستەر كلۋبى جۇمىس ىستەيدى. 70 ادامعا لايىقتالعان زالى بار.
مەديا ورتالىق ارقىلى تۇرىك، ءازىربايجان، ورىس، وزبەك، قىرعىز تىلدەرىندە اقپارات تاراتىلادى. سونىمەن قاتار، قازاقستان مەن تۇركىستان وبلىسى تۋرالى اقپاراتتاردى اعىلشىن تىلىندە دە تاراتۋ كوزدەلىپ وتىر.
قاسيەتتى قالاعا كەلگەن وتاندىق جانە شەتەلدىك جۋرناليستەر اقپارات تاراتۋدا ورتالىقتىڭ قىزمەتىن اقىسىز پايدالانا الادى.
وسى ارقىلى تۇركىستان وبلىسى مەن تۇركىستان قالاسىنىڭ تۋريستىك الەۋەتى جوعارىلاپ، ينۆەستيسيالىق تارتىمدىلىعى ارتادى دەگەن سەنىم بار.
ال، «TÚRKءىSTAN» ينتەللەكتۋالدى كلۋبىندا ءتۇرلى تاقىرىپتاردا باسقوسۋلار، دوڭگەلەك ۇستەلدەر مەن ەل رۋحانياتىنا وڭ ىقپال ەتەتىن جيىندار وتكىزىلىپ تۇرادى. ەلىمىزدىڭ ينتەللەكتۋالدى تۇلعالارى كلۋبتىڭ وتىرىسىنا ارنايى شاقىرتىلىپ، ءتۇرلى ويلارى مەن ۇتىمدى ۇسىنىستارىن ورتاعا سالادى. بۇل كەزدەسۋلەر تەلەارنالار مەن الەۋمەتتىك جەلىلەردە ارنايى باعدارلاما رەتىندە كورسەتىلەدى.
قازاقستاندىق جانە شەتەلدىك ب ا ق باسشىلارى مەديا ورتالىقتىڭ تۇساۋىن كەسىپ، يگى باستاماعا ساتتىلىك تىلەدى. وسىنداعى جاس جۋرناليستەرمەن جانە ستۋدەنتتەرمەن كەزدەسىپ، پىكىر الماستى.
سونداي-اق «TÚRKءىSTAN» ينتەللەكتۋالدى كلۋبىنىڭ ءبىرىنشى وتىرىسى ءوتىپ، العاشقى سپيكەرلەر رەتىندە وبلىس اكىمى ج. تۇيمەبايەۆ پەن تانىمال پۋبليسيستەر تۇركىستاننىڭ دامۋى جونىندەگى ويلارىن ورتاعا سالدى.
