ەلباسىنىڭ قالاۋىمەن ەندى عارىشكەر تالعات مۇسابايەۆ، گەنەرال پروكۋرور ساۋلە ايتبايەۆا، سەنات اپپاراتىن باسقارعان ۆلاديمير ۆولكوۆ جانە بۇرىنعى ءبىلىم ءمينيسترى باقىتجان جۇماعۇلوۆ بۇدان بىلاي زاڭ شىعارۋمەن اينالىسپاق.
ءبىراق جۇماعۇلوۆ بۇگىن كۋالىگى مەن توسبەلگىسىن الۋعا كەلمەي قالدى. دەسە دە، ارىپتەستەرىنىڭ جازعى دەمالىستا ەكەنىن ەسكەرسەك، ولار سەناتقا ەندى قىركۇيەكتە ءبىر-اق كەلمەك.
پرەزيدەنتتىڭ كەڭەسشىسى بولعان تالعات مۇسابايەۆ سەناتور بوپ تاعايىندالعانىن تەلەفونىنا تۇسكەن قۇتتىقتاۋ حاتتارىنان ءبىر-اق ءبىلىپتى. شۋلى مالىمدەمەلەرىمەن تانىمال مۇسابايەۆ جوعارعى زاڭ شىعارۋشى ورگاندا دا جەردەن بۇرىن اسپانعا ءبىر تابان جاقىن بولماق.
– ەتىكشى ەتىك تىگۋمەن اينالىسۋى كەرەك قوي. سول سياقتى اركىم ءوزى بىلەتىن ىسپەن شۇعىلدانۋى ءتيىس دەپ ويلايمىن. سوندىقتان مەن سەناتتا عارىش، قاۋىپسىزدىك ماسەلەلەرىن كوتەرەتىن بولامىن. ەڭ باستىسى ەلىمىزدىڭ دەربەس عارىش ونەركاسىبىن دامىتۋعا ۇلەس قوسقىم كەلەدى، – دەدى سەنات دەپۋتاتى تالعات مۇسابايەۆ.
اۆتور: دوسجان مارات ۇلى
دەرەككوزى: كتك ارناسى
