سولتۇستىك قازاقستان وبلىسىندا سوت پەتروپاۆلداعى زيكستو زاۋىتىنىڭ بۇرىنعى جۇمىسشىلارىنان اكسيالاردى سيمۆولدىق اقشاعا ساتىپ الۋ تۋرالى كەلىسىمدەر مەن شەشىمدەردى جارامسىز دەپ تانىدى. بۇل تۋرالى مەملەكەتتىك ورگاننىڭ باسپا ءسوز قىزمەتى حابارلادى، دەپ حابارلايدى Dalanews.kz.

ۆاگون شىعاراتىن زاۋىت 90-جىلدارى جەكەشەلەندىرىلگەن. سول كەزدە كوپتەگەن جۇمىسشى ءوز ۇلەسىن اكسيا تۇرىندە العان – نەگىزىنەن ديۆيدەند الۋعا قۇقىعى بار، ءبىراق داۋىس بەرۋ قۇقىعى جوق ارتىقشىلىقتى اكسيالار.

2023 جىلى نەگىزگى اكسيونەرلەردىڭ ءبىرى – "پرەميۋمۆاگونكومپلەكت" ج ش س ديرەكتورى جانە ايگۇل مىرزاحانوۆا جينالىس وتكىزگەن. زاۋىتتى باقىلاۋعا الۋ ءۇشىن ولار قوسىمشا اكسيالار شىعارىپ، وزدەرى ساتىپ العان. سولاردىڭ شەشىمىمەن جارتى ميلليونعا جۋىق ارتىقشىلىقتى اكسيا جاي اكسيالارعا اۋىستىرىلعان – جانە ولاردىڭ بارلىعى ەكى ادامنىڭ قولىنا وتكەن.

كەيىن زاۋىت بۇرىنعى قىزمەتكەرلەردەن اكسيالاردى ءبىر داناسىنا 16 تەڭگەدەن ساتىپ العان. مىسالى، بۇكىل ەڭبەك جولىن زيكستو-دا وتكىزگەن ارداگەردىڭ مۇراگەرلەرىنەن 73 اكسيانى 1253 تەڭگەگە ساتىپ العان. ال كوپشىلىك اكسيونەردە نەبارى 3-5 اكسيا بولعان، ول ءۇشىن ولارعا 50-80 تەڭگەدەن ارتىق تولەنبەگەن.

سوتتىڭ انىقتاۋىنشا، بۇرىنعى اكسيونەرلەرگە بۇل وزگەرىستەر تۋرالى ەشكىم ەسكەرتۋ جاساماعان. اقپارات تەك قارجى دەپوزيتارييىنىڭ سايتىندا جاريالانعان، ال زەينەتكەرلەر ول سايتقا كىرمەگەن. ناتيجەسىندە مىڭداعان ادام ءوز مەنشىگىنەن جانە زاۋىت تاعدىرىنا اسەر ەتۋ قۇقىعىنان ايىرىلعان.